الأربعاء، 30 ديسمبر، 2009

2010 happy new year



كم أنا حقا محظوظه..لان تكون بدايه تدويني
مع بدايه2009.
1/1/2009 قررت بدء عالمي معكم,,وأنشئت ذاتي الالكترونيه
لأراني من خلالكم...

وكم انا أكثر حظا الأن لأن تكون بدايه2010

هي بدايه السنه الثانيه على وجودي هنا...

(كل عام وأنتم بخير)


أتمنى لكم جميعا اجمل لحظات الحب والسعاده

ومزيد من الروعه والابداع

ومزيج من الورود اهديها لكم جميعا

..في قالب حب اخوي اكثر من رائع
اشكركم جميعا وبشده...,اشكر من عرفني
وأشكر من انشئني واصطنع لي مكان هنا بينكم...
.ولأنك تعرف نفسك جيدا

...فأمنيتي لك ب2010 سعيده
..............................
(2009)

سعيده بإنجازاتي المتواضعه اللتي اخرجتني حقا مبتسمه

(2009)

حبيت الورد وحبيت الناس وحبيت اعيش مرفوعه الراس

(2009)

رسمت قيود

(2009)

كسرت قيود الماضي

(2009)

أفشيت سرا اتعبني

(2009)

مرآتي أرتني قلوب حقا تحبني وتستحق الخير

(2009)

أشعل داخلي بصيص أمل أوشك على الإنتشار

(2009)

إتعلمت أتفائل جدااااااااا

(2009)

باين لي إنه بشره خير ل 2010

(2009)

عرفت ناس كتير,وحبيت ناس كتير

واتعلمت حجات كتير

..................................

(2010)

لا أرغب ابدا بالتوتر

(2010)

مش هانسى ابدا قلب حبني

(2010)

رغم كل شئ انا متفائله

(2010)

قاربت على الوصول

(2010)

عام تخرجي

(2010)

اشكرك جدا على تواجدك في 2009

(2010)

لن يتحول حلمي الى كابوس

(2010)

سأعطي الله حقه دائما

(2010)

يارب مايجيب زعل

(2010)

مش هانسى ابدا قلبي

(2010)

هاديله فرصه يعيش

(2010)

...منار بشكل أجمل سأكون




الجمعة، 25 ديسمبر، 2009

مااسمعشي صوتك


,,لا تخاف ولاتنادي

بعلو صوتـــــــك

,,ولا تهاب لأي بشر

واقفه في صــوبك

,,لأجل ذاتك

خد قـــــرارك

..ومن دماغـــك

,وحب نفــسك

,وحب غــيرك

...ومااسمعشي صوتك

الاثنين، 14 ديسمبر، 2009

صبح بنُور


,تقيل الحمل فوق كتفي

,ومهما يادنـــــيا هتلفي

.فشراع المركبه قصير

,تجيلها الموجه تتـــدير

,وأسهل ليها تتألم وتتحير

.وفي المرسى تقوم تشــكي

بإن البحر كان ضدي

وإن الموجه مش صفي

ومش عارفه تثبت خطوه
,,علشاني

لأن الدنيا كالعاده
,,معانداني

ومهما الكل عداني

وموج البحر غطاني

.فشراع المركبه قصير

وهيجي اليوم

وتتكــــسر

...وتتبـعـتر

.ومش هلاقيني جوا الدنيا من تاني

لأن الدنيا
.... مش بتلف علشاني

ويفضل حملي فوق كتفي

,عليه حلــــمي

,عليه رســــمي

,عليه أحلام من عمري

..عليه أوهام من قلبي

,كتــــــب ربي

أشوف المركبــه بتـغرق
كمان قلبي..

ماهو أكيد كان غرقان

ويعمل إيه في وسـط المـوج
...فضل قلقان

لا يجي اليوم وتمشي الموجه وتسيبه

..وحيد غرقان

ومااستعجلشي

لأن اليوم ده جه بدري

...بدون حسبان

,أتاري الموجه مش صفه

,وحتى البحر كان ضده

,وحارب مركبه المكسور

,منع حلمه يشوف النور

وكسر حلمه قدامـــه

,,مابيـن ليـــله
,,مابين اتنيــــن
.صبح بنٌور

...حنـــــــــــــــيه


بفكره واحــد مــننا وعليــــنا

وكان من فتره رايح جاي علينا

بس رجع ومشي وقال سايبهالكم

....بس كل فين وفين لما بنشوفه


(حنـــــــيه)
ده اسم ويب سايت جديد هو عمله بمجهوده وبدعمه الشخصي

واكيد لازم مننا كلنا لاننا كلنا منه وعليه...نباركله عليه ونسيطر على السايت كمان

جايز هو مفكر انه اتنسى عشان بقاله كتير مش في وسطنا

ومدونته اختفت بالتدريج

بس اكيد مش هي دي الحقيقه....

مدونتك مازالت موجوده ولو رجعت هتلاقي الكل فاكرك

بس حب مدونتك تاني واعرف انها جزء منك...







الأحد، 6 ديسمبر، 2009


اللي متأكد إنه يعرفني ....

اللي يعرف منار فايد...

أو يعرف شباك موارب...

أو يعرف الاتنين.....

يقـــــــــــــــــــول رأيه

ومش لازم خالص بكلمه واحده

دي صوره بتعبر مش أكتر....

قولولي رايكم فيا,,,أو في المدونه,,, أو في مواضيعها

المهم أسمع رايكم جميعاااااااااااا

واعتبروه برضو بوست للعتاب

أنا حاسه ان كتير منكم شايل مني

او زعلان شويه....


وهبقى زعلانه جدا لو ماقلتوش رايكم بكل صراحه

الجمعة، 27 نوفمبر، 2009

كل عيد خرفان وانتم بخييير



النهارده العيد....


ايوا أنا صممت أنزل البوست يوم العيد


كل سنه وانتم طيبيييييييييييييييييييييين


ويارب كل زواري وقراء مدونتي وأصدقائي


واللي يعرفني واللي مايعرفنيش


**بخير وسعيد ومبسوط**



بالمناسبه دي أنا عايزه كل واحد يدخل عندي

يكتبلنا أحلى مسج للعيد جاله وعجبه

ومن مين جاله؟؟

طبعا احنا عارفين ان عرض الالف مسج خلاص انتهى

بس برضو في ناس بتضحي ب30 قرش عشان خاطر عيوننا...


وعشان ماحدش يزعل مني

فأنا اللي هابدء..


المسج ده أول مسج يوصلني للعيد

من( نوره )واحده صاحبتي جدا من زمان أوي في السعوديه

فرحت جدا بيه لانها أول من افتكرني

وكمان عاجبني جدا وبعته لاصحابي

(سأسكب في معايدتي ودادي)

(وأهديها لمن سكنوا فؤادي)

(وأجعل نفحها مسكا وعطرا)

(ونبض القلب أبلغ من ينادي)
(عيدكم مبارك)






الجمعة، 20 نوفمبر، 2009

ماكتبت عن أحداث مصر والجزائر



الكل نزل بوستات في موضوع الماتش واللي حصل بعده

واهو كل مااشوف بوست اروح واكتب كومنت..

ولقيت ان كل واحد فينا بيبص للموضوع من ناحيه واحده او من ناحيتين

انا بجد بقيت حزينه جدا على اللي حصل في الاسبوع ده...

هي راحت ولا جت كوره يعني لعبه...

بس برضو لعبه ايه دي اللي ننضرب ونتهان فيها وحد يمس كرامتنا

ساعتها بقى يبقى ننسى موضوع اللعبه خالص بس ماننساش اللي جرالنا....

شعب واحد وامه عربيه والكلام ده ماقلناش حاجه

بس بعد اللي حصل ده مش هنفضل برضو نقول اخوه عربيه

لان ساعتها ده هيبقى جبن وخييييييييييييييبه

انا بفضل علطول افكر ياترى حكومتنا هتعمل ايه وتتصرف وتاخدلنا حقنا...

ولغايه دلوقتي مافيش حاجه باينه خالص

عارفين طبعا ان ده نسانا حجات كتير وخلانا نتغاظى عن حجات كتير عن حكومتنا

بس برضو وايه يعني احنا مصريين مع بعضنا حريين

انما يجي حد غريب ويقول كلمه او يمس شعره مننا ده اللي مانرضاهوش

*** **** ***** ***** ******* *********


اتحرق دمنا واحنا بنتفرج ع الماتش وكانت حرب اعصاب وليله مايعلم بيها الا ربنا

انا أصلا مش من المشجعيين باستمرار للكوره

بس دي بلدي بتلعب ياجماعه

بلدي بتنضرب

بلدي بتتهان

يبقى الموضوع مش موضوع كوره


الموضوع كبر جدا جدا كماااااااااااااان


وانا مستنيه أشوف حكومتنا المصريه هتتصرف ازاي

*************


أخيرا بقى أنا مش مزعلني خالص اننا ماكسبناش الماتش

احنا كسبنا حجات اكبر من كوره في شبكه

وهما كسبوا الجون

وخسروا وهيخسروا حجات كتير

اللي بس عايزه أقوله إني مستخسره فيهم الفرحه واللي ربنا كتبهالهم لسبب في علم الغيب



الأربعاء، 11 نوفمبر، 2009

البوست الأخير من السعوديه



أنا مضايقه وزعلانه,بقالي كتير مانزلتش بوست جديد.


مش عارفه ليه بجد؟


مع ان الأحداث كتيره هنا جدا.أنا متلخبطه اوي بصراحه وأنا بكتب المره دي


ولأول مره أجي أكتب بوست على المدونه من غير ماأكون مجهزه أنا هاكتب إيه قبلها,,


بوست المره دي فعلا أخر بوست هاكتبه من السعوديه لأن طيارتي يوم الجمعه إن شاء الله وراجعه مصر...


أنا ارتحت هنا جدا وكانت بجد أجازه حلوه على عكس ماتوقعتها...


طبعا مضايقه وزعلانه عشان مسافره وأهلي هنا..


ولأول مره بجد هابعد عن توؤمي محمد لأنه هيفضل هنا مع ماما وبابا...



إزاي مش هاشوفه في الكليه بعد كدا ولا في البيت بجد مش عارفه,,






*****وحشتوني كلكم وبحبكم جدا وبتمنالكم الخير



ومش عايزه حد يزعل على تقصيري في حق الردود على تعليقاتكم او مواضيعكم



****كان نفسي أوي أحضر اللقاء التدويني اللي تم في المنصوره الاسبوع اللي فات


وكان نفسي بجد أحضره من زمااان بس طبعا ماعرفتش.....


إن شاء الله نعمل لقاء تاني في المنصوره....




وهاقوم أظبط الشنط بتاعتي خلاص كل يوم أاجلها وأقول لسه بدري


بس خلاص بدري جه...







(أستودعكم الله جميعا الذي لاتضيع ودائعه)




الأربعاء، 28 أكتوبر، 2009

ورده حياتي


ورده حياتي بلمسه منك فتحت

لما شعاع الحب راح منك لها


ولما إيـديك وبـرقه منــك قربـت

شـالت خيوط الصمت من على بؤها


فرحت أوي وخدت النفس واتنفست

وطلع الكلام بأعلى صوت من قلبها


ماتكفنيــــــش اللمسه منك بس أنا

تكمل حياتي جنب منك

بنظره منك

بلمسه منك
بهمسه منك
وتكمل حياتك جنب مني وليا أنا

السبت، 24 أكتوبر، 2009

؟؟؟؟هو أنا مش هاتجوز,,أشتغل ليه بقى


كان بقالي كتير ماروحتش المنتزه اللي عندنا في السعوديه.. ومش اقولكم ان المنتزه ده بالذات كان اكتر مكان لازم نروحه اخر الاسبوع من واحنا صغيرين..بس رحته لما حسيت بحاله ملل جتلي من الوحده ومن سفر اخواتي مصر

فاقترحت ع بابا يوديني.ساعتها بابا قالي ياااااااااااااااه دا احنا بقالنا كتير اوي ماروحناش هناك...

دا بقى المدخل اللي في الاول خالص
وده كمان.....
دي بقى النافوره اللي في بتطفي الساعه عشره بليل....معاهم حق الناس برضو الناس عايزه تنام
ودي كمان من بعيد...........
عارفين بقالي تقريبا سنتين ماروحتهوش بس اول مادخلنا كان الوضع عادي جدا مع اني حسيت حاجه غريبه
تقريبا الناس مابقاش عندها وقت تخرج وتخرج نفسها وتخرج عيالها.....
زمان كان بيبقى زحمه اوي وحيوي جدا...
الوضع ده خلى فكره عياليه استهوتني جدا وركبت دماغي بقى الا العب واتمرجح واطير في الهوا
بابا بقى ضحك ساعتها جدا وقعد يصورني وكشي ورايا بالكاميرا...
بجد(فكرني بايام زمان),
بس سهيله دي بجد طلعت حكايه....بنوته زي القمر ولقيتها قربت مني وفي ايديها بوكيه ورد
على زرع ع حجات كتير المهم انها تكبره وخلاص
في الاول تسالني انتي مابتتكلميش ليه؟
انا بقولها هو في حد هنا اصلا
تقولي معاكي حق
ولقيت نفسي بتلقائيه غريبه بسمع لها ولاسئلتها الغريبه وتفسيراتها الاغرب
الاغرب بقى اني كنت مستمتعه جدا بالكلام معاها
والتزمت الصمت عشان ادي لنفسي وقت اسمعها اكتر
والااغرب كمان ان كلامها عجبني جدا وشدني كمان
شفت فيها انطلاقه رهيبه وامل وتفاؤل
وبسمع ليها ولكلامها وعامله اني مصدقاها وزي مابيقولوا(سايقه الهبل)
**************
لعبنا كتير واتبسطنا كتير وعملنا بوكيه ورد كبير اوي
وطلع السؤال مني ليها
عايزه اما تكبري تطلعي ايه؟؟
تقولي انا لما اكبر هاتجوز
قلتلها تمام وتشتغلي ايه بقى لما تتجوزي
تقولي هاتجوز وكفايه عليا شغلانه واحده
ساعتها تعالت ضحكات هستيريه قويه مني
ودمعت عنيا من كتر الضحك
وقلتلها معاكي حق تصدقي,,,,,
حسيت وقتها ان الامل قال لقلبي ياعم اضحك بقى مافيش حاجه مستاهله
وحسيت ان فعلا كنت محتاجه لقلب سهيله وروح سهيله
....ولمعيله سهيله ولاجمل ابتسامه ف الدنيا لسهيله....


السبت، 17 أكتوبر، 2009

.. حلم ولسه مااتحققش





بحلم إني أصطاد سمك...

....مش مهم اصطاد سمك ولا لأ


....ومش مهم السمكه طلعت كبيره ولا صغيره

....مش مهم هي صاحيه ولاميته


...مش مهم هي اصلا سمكه او أي حاجه تانيه ..

المهم انه حلم نفسي احققه من صغري بس للاسف

مااتحققش

************************




بحلم كمان اني أعزف على بيانو من صغري
..وساعات بتخيل نفسي كدا بعزف عليه
..بحبه كدا مع اني ماجربتهوش

مش عارفه عندي احساس ان اللي يعزف عليه دا مش شخص عادي
...يمكن يكون فضول مش اكتر

بس سالت عليه عشان اجيبه مع اني مابعرفشي اعزف عليه

بس لقيته غالي؟؟

المهم إنه حلم نفسي احققه من صغري بس

مااتحققش

******************************


بحلم كمان اني اروح شلا لات وتكون مش اي شلالات

,,عاليه وكبيره ولون اخضر مالي الكون اللي حواليها
,,وتعمل رغاوي كتير لما الميه تنزل من فوق قوي

بس لسه برضو الحلم مااتحققش
******************************

كمان بحلم بحاجه واحده أهم من دا كله

...ومن كل اللي اتكتب
وبتمناها أوي

,,وياعالم

بس لسه برضو الحلم مااتحققش





الثلاثاء، 29 سبتمبر، 2009

إنســـــــــــــــحابي


....آسفــــــــه جدا

...غصب عني

...من دماغي,

أنا مره هامــــــــشي

....وأقفل الصفحــــــه بإيديا

....مني ليك أكبر هديه


(إنـــــــــــــــــــــسحاااابي)


مهما تتحايل ونفـــسك

يرجع الماضي اللي فيا,

جوا قلبي

,جرح منك

لما بتزيد من كلامك

.يكبر الجرح جوا قلبي

ورغم عني

ورغم عنك

ورغم شوق عايش مابينا

كان قراري

برضو راضيه

وانت ترضى

.بالقرار ده

ومش مهم بالنسبه ليا

لاني قدمت الهديه


(إنسحـــــــــــــااااابي)


الأحد، 20 سبتمبر، 2009

بوست العيد لاستقبال التهاني..كل عام وانتم بخير


النهارده العيد....

يارب تكونوا كلكم بخير

وكل سنه وانتم طيبين....

ويارب دايما كل حياتنا افرح واعياد..

ماتزعلوش عشان رمضان خلص خلاص..

هتقضوا يعني يوم العيد زعلانين وتنسوا تفرحوا....

ياريت كلنا في اليوم ده نحاول ننسى اي حاجه مزعلانه من اي حد...

نحاول ننسى اي خناقه لينا مع جيرانا,

مع بواب عمارتنا,

مع اصحابنا في الشغل,

في المدرسه.

في الجامعه,

اتصالحم مع كل الناس بس ماتنسوش تتصالحم مع نفسكم...

ابدؤا انتم بالتهاني..وماتستنوش وتقولوا اشمعنى يعني انا اللي اتصل انا اتصلت العيداللي فاتت!!

خليكم تكسبوا ثواب واكبروا في نظر نفسكم الاول وفي نظر الناس..

ابدئوا بالتهاني وانسوا اي زعل....

بلاش خالص اي خناق النهارده وبلاش اي زعيق لاولادكم...

قولوا لعيالكم كل سنه واهما طيبيين قبل مايسمعوها من الناس التانيه...

*********

بالنسبه لي فده اول عيد تدويني ليا,عيد السعوديه مختلف تماما عن مصر..

واجمل حاجه حصلت ان مصر عيدت مع السعوديه لاني كنت هازعل جدا لو اختلفنا في يوم

نفسي كلنا نحس بالفرحه سوا ومع بعض وفي يوم واحد.....

********

سلامي لحضراتكم كلكم بلا اسثناء...

الأربعاء، 16 سبتمبر، 2009

.... تخاريف بنكهه الكلام....




انا داخله النهارده اكتب بس بصراحه مش عارفه اكتب ايه؟؟

في بالي كلام وحجات كتيره....

خلوني الاول اقولكم كلكم كل سنه وانتم طيبين ويارب دايما تكونو بخير...


*********************

كنت وانا صغيره غريبه جدا....كان تفكيري اني اهم حاجه عندي ماحدش يزعقلي مهما كانت الغلطه اللي عملتها

يعني انا كنت بحاول على قد مااقدر مااعملشي الغلط ولو عملته يبقى لازم اصححه بسرعه جدا مش عشان انه غلط وقتها

عشان ماحدش ياخد باله ويزعقلي بسبب كدا.......

**********************

ماما بتحكيلي على موقف انا ومحمد (توؤمي )اتخانقنا عليه واحنا عندنا يادوب سنتين وقت ماسمعنا الاذآن في التلفزيون

وانا طبعا وقتها زعلت جدا إن ازاي المؤذن يقول ( اشهد ان محمد رسول الله )وانا اتخانق مع محمد وقتها

واعيط واقوله (منار رسول الله) - بدون تعليق-

*********************

وانا صغيره بلاقي نفسي غصب عني لو حاجه ماعجبتنيش لازم اتريقأ عليها ودي حاجه غلط طبعا ومضايقاني..

بس باخد جزاتي فيها..يعني مره كنت سمعت طفل صغير عمال بيصرخ في الشارع وواقف يعيط

وجوا هدومه حشره كبيره وماحدش قادر يشيلها....

انا وقتها اتريقات عليه في سري طبعا بس مش فاكره قلت ايه...المهم بعدها بكام يوم قمت من النوم مفزوعه عشان صرصار كبيركان دخل هدومه ولقيته نايم جوا كمي....جايز كان بردان؟؟؟

*********************

مش عارفه ليه دايما الام والاب بيحبوا يكرروا كلامهم دايما...مع انهم لو قالوا الكلمه مره واحده اكيد احنا بنسمع من اول مره..يعني مثلا لو بابا قالي منار ماتسهريش كتير...حاضر يابابا...كل مايشوفني قدامه في البيت لازم يتكرر الكلام ماتسهريش يامنار.....انا بقى بتنرفز بسرعه من كدا ودايما يكون تبرير الاجابه احنا خايفين عليكم يعني هيا دي جزاتنا؟؟؟

هي فلسفه غريبه فعلا عند معظم الاباء والامهات ان ماكانشي الكل ....مش فاهمالها سبب.....

************************

سمعت امبارح جمله عجبتني جدا في التلفزيون ,,الجمله مش غريبه عليا بس امبارح حسيت كاني اول مره اسمعها

((الحب بيعوضنا عن الاصحاب بس عمر الصحاب مايعوضونا عن الحب))

**********************

ليه هنا في السعوديه الاقي كل الناس اللي بيصلوا في المسجد بيغطوا وشهمم باكبر كميه من الغطا عشان ماحدش يشوفهم

لدرجه اني ساعات بصلي جنب اي واحده وتعدي الصلاه وانا مااعرفشي شكلها مع ان المسجد طبعا كله للستات بس....

وسمعتها من واحده هنا انها بتصلي التراويح في البيت عشان ماتروحشي الجامع وحد يشوفها....

ليه؟؟؟؟

هو احنا بنعمل حاجه غلط؟؟؟

ليه الشيطان بيتسلط على بعضنا ونجهر بالمعصيه ونفتكرها مفاخره وتباهي باننا بنعمل حاجه غلط
ووقت مانعمل حاجه صح:::

بنستخبى؟؟؟؟

دا مالوش دعوه خالص طبعا بالرياء....الرياء مش في اننا نصلي والناس تشوفنا....

********************
اعذروني
البوست طول مني غصب عني.....

الجمعة، 11 سبتمبر، 2009

.... الدنيا مابتديش كل حاجه.....


(الدنيا مابتديش كل حاجه)

أسمعها قليلا من والدي...تقلقني جدا عندما اسمعها من والدتي....

اضطرب اكثر عندما اسمعها من الكثير ممن يغلب عليهم اليأس والكبر والتشاؤم....

ارى ان تكرار هذه الكلمه بهذا الشكل من حولي يدعو بي للقلق والخوف والتوجس من سماعها,

احيانا اظن انها اذا ذكرت من اي شخص او سمعتها في اي حوار اظنها قيلت لي...أظنها تقال بأعلى صوت لأسمعها.

يضطرب قلبي لسماعها....أراها تخيفني...

تخيفني من المستقبل...تجعلني اعيد النظر فيما أمتلكه حتى إذا فقدته او أخذته مني اشعر بخسرانه.......

تجعلني اعرف جدا قيمه ماامتلكه واعيد النظر في استخدامه حتى إذا فارقني او فارقته أشعر أنني يوما ما امتلكته.,,,,

تخيفني حينما أترقب انها لابد أن تقال لي يوما ما.,,,,وتدور في خاطرتي ياترى ماذا سأكون افتقدت أو حرمت منه وقتها...

أدعو الله دوما أن لا أحرم شيئا يعنيني.....,,

ربما أظن لمعظم القارئين بي شيئا من الطمع....ولكني فعلا من أشد المؤمنين أن الله لايعطي ابدا الكمال لأحد إلا له وحده...

قد يكون تفكيري بهذه الطريقه سخيف نوعا ما.,,,,,.ولكنه يعنيني ويدور في خاطرتي ومن حقي تدوينه....

الجمعة، 4 سبتمبر، 2009

يـــــــــــــــــــــــــــارب


لقد ضعفت ولا غيرك يقويني,

لقد يئست ولم افقد فيك يقيني,

لقد ضللت ولا سواك هاديني,

لقد غرقت وانت فقط منجيني,

(يـــــــــــــــــارب)

ارحمني في لحظه ضعفي وابعد عني شيطاني نفسي

واهد لي قلبي وعقلي واغفر لي خطيئتي ويأســــــي

(يـــــــــــــــــارب)

إلى من أشكو وأنت موجود,

ولمن أبكي وبابك غير مردود,

ومن أدعو وأنت فقط المعبود,

ومن أرجو ورجائي فيك غير محدود,

(يــــــــــــــــــارب)

إجعل عفوك عني دائم

ورضــــاك علي قائم

واجعلني عن الذنوب نادم

ولبـــــــــــاب توبتك دائم

الجمعة، 28 أغسطس، 2009

بمناسبه ان نتيجتي ظهرت وجبت جيد جدا.....



لو هاقول اتاخرت في البوست المره دي انا عارفه.....انا حاليا في السعوديه
بس أنا اخدتلي كام يوم دلع من امتحانات وسفر جم ورا بعضهم .....وكملت ببرد مش راضي يسيبني....

وحشتوووووني جدا جدا وده بصراحه وبكامل قوايا العقليه....وبشكر جدا جدا كل حد سلم عليا يااجدع اصحاب عرفتهم

من غير مااشوفهم......

__________________________


انا عايزه اقولكم اني في السعوديه هنا تمام جدا جدا الحمد الله

ورمضان هنا جميل جدا جدا رمضان هنا ديني ديني بحت............

انا طبعا بتمنى كل حد فيكم يبقى كويس واموره تمام.....

الجو هنا حر اوي بجد حاجه لاتحتمل والتكييف ليل نهار شغال مش بيبطل ولا كانه شغال لو طفيته دقيقه كاني قاعده في صحرا.....

مصر حر طبعا بس انا كنت فعلا بتدلع لما كنت اقول كدا......الحر كله هنا.......

_______________________

******بابا كان واحشني جدا الحمد الله ربنا كتبلنا واتجمعنا ولقيته مبسوط اوي من المدونه بتاعتي

ولقيته مستغرب ان كل الناس دي بترد عندي....واكتشفت بقى انه حاطط مدونتي في الفيفورت عنده وبيتابعها...........

________________________-

هنا الحياه محدوده جدا وخصوصا كمان اني في اجازه والناس كلها في اجازه.........يعني لما حد ينزل الشارع يلاقي الشارع

فاااااااضي ونضييييييييييف جدا ومافيش حد ماشي خالص.....هدوء جميل جدا.....هما برضو معدورين ازاي هيمشوا في الحر ده

كل المشاوير لازم تتقضى بالعربيه......

_______________________--

سهوره وحشتني اوي(شبه انسانه تحاول الاقتراب)) كنا مفروض نتقابل قبل مااجي السعوديه بس ربنا ماكتبش

ان شاء الله هي اتفقت معايا وده قراري انها هتستناني في المطار وماتحاوليش ياسهر......

بحبك جدا يااحلى سهوره.....وربنا يوفقك يارب واشوفك عروسه قد الدنيا......

__________________________

انا لسه ده يعتبر اول اسبوع اجازه بالنسبه لي......عندي اجازه طويله الحمد الله يجي تلات شهور

عايزين نروح مكه بس خايفين جدا.........انفلونزا الخنازير منتشره هنا جدا جدا

وناس بابا يعرفهم كتير رجعوا من مكه وجاتلهم العدوى.....

ربنا يستر ان شاء الله ويكتبهالنا..........

___________________________

ساره(صاحبه مدونه ساره) عرفتها اكتر لما رحت السعوديه وبقينا اصحاب اكتر واكتر

هي زي العسل وقلبها طيب جدا جدا........كل سنه وانتي طيبه ياسرسوره

__ ______ _______ _____ ____ ____


(هااااااااااااام جدا)

النهارده بقى بجد عايزاكم تفرحوا معايا انا نتيجيتي ظهرت النهارده وجبت
(( جيد جدا))......

الحمد الله يارب........وده بالدات كان سبب اقوم اكتب بوست عشان تفرحو معايا.....

انا بقالي بالظبط سنه بادن الله وابقى دكتوره......دكتوره رسمي.وفهمي ونظمي كمان.....

الف الف مبروك لاي حد من دفعتنا يقرا البوست وبجد انا فرحاانه لكل حد فيكم وعقبال السنه الجايه ان شاء الله.....

______________

يارب نحاول على قد مانقدر مانضيعشي من رمضان اكتر من كدا......

ربنا يكتبلكم جميعا ويكتبلي التوفيق والخير........


الخميس، 20 أغسطس، 2009

......أنا مسافره......


كل سنه يارب وكلكم طيبين..ويارب رمضان كريم عليكم...وينعاد علينا جميعا

وحشتوني جدا جدا وهتوحشوني اكتر كمان كام ساعه.....

الفتره اللي فاتت أنا بعتذر بجد والله لكل حد فيكم...أنا كانت بتوصلني تعليقاتكم عندي

بس عشان امتحاناتي ماكانتشي عندي وقت أرد عليها أو أزور باقي المدونات...

الصراحه بقى وحشني عالم التدوين في الكام يوم اللي فاتو دول....

فكرت كتير أسيب التدوين فتره مؤقته في رمضان ولا لأ.....بس لقيت ان الاتنين

مالهمشي دعوه ببعض...نفسي يارب يكون رمضان السنه دي مختلف عن اي رمضان عدى بالنسبه لي حتى...


أنا اوعدكم ان شاء الله اني مش هاقصر تاني ناحيه حد فيكم او عشان مدونتي...

خلاص ماعادليش حجه...أنا خلصت امتحاناتي الحمد الله وهاخد اجازه تلات شهور....

ومسافره ان شاء الله السعوديه النهارده....وبقالي يومين مانمتش وخلاص انا كدا هنجت...وشكلي مش هنام الا لما اوصل باذن الله

.يارب كل حد فيكم يارب يكون كويس....

وهتوحشوني جدا جدا.....وان شاء الله أحاول ادخل نت هناك على قد مااقدر...


أنا هاشيل خلاص الاشراف على التعليقات ابتداء من النهارده لامته مااعرفشي...

عايزه اشوف تعليقاتكم عندي لان بجد انا بفرح بكدا جدا.....


بشكر ربنا جدا على كل حاجه....

وبعتذر جدا جدا لاي حد فيكم كان عنده ظروف وفاه لتقصيري

بعتذر جدا عن الملتقى اللي ماحضرتوش ودا غضب عني وبشكر جدا كل اللي دعوني

بعتذر لاي حد مر بمناسبه سعيده وبان تقصيري عنده

انا مسامحكم كلكم كدا على بعضكم......ويارب تسامحوني من غير ماتعرفوني

كفايه ان احنا اتجمعنا تحت سقف واحد......


سبحان الله بقى مع ان هنا نت وفي السعوديه نت بس انا حاسه ان نت هنا غير...

حاسه وانا هنا انا قريبه من كل حد بس مش حاسه ده هناك مع ان النت هو النت.....


البوست المره دي انا خدت خمس دقايق عشان اكتبه لاني مشغوله جدا بس ماهانشي عليا طبعا اسافر من غير مااودعكم

(أستودعكم الله جميعا الذي لاتضيع ودائعه)





الاثنين، 10 أغسطس، 2009

.... قولو رأيكم


أنا لازم أضحك كل يوم مره
أنا لازم أقتل دمعتي المُره
لا في يوم هاقف وف سكتي هامشي
وهاكون على تاج النجوم دُره
**********************
من روائع فلافيو.......عاجباني جدا جدا حبيت انقلهالكم عشان تقروها
وياريت بقى يقتنع زميلنا الغائب# فلافيو #ويرجع للتدوين تاني.....
معايا بقى اقولوا رايكم.....
دا لينك المدونه
http://qasaed.blogspot.com/

الجمعة، 7 أغسطس، 2009

!!!!!!!يابخته

ياما نفسي بجد أشيل دماغي وأرميه برا راسي
وان شاء الله حتى لو مده قصيره......
نفسي ابطل افكر في كل حاجه......
نفسي أريح دماغي من التفكير لو يوم بس يارب....
أصعب حاجه عندي.....
لما أكون مستنيه حاجه معينه
او مستنيه اسمع خبر.......
أو أكون مستنيه الوقت يعدي....
مش شرط يكون الخبر مهم بالنسبه لي ولا لأ.....
نفسي أروح مكان بعيد خالللص واقعد لوحدي هناك مده
ومش عايزه أشوف ناس خالص......
عايزه هدووووووووووووووووووء.......

الثلاثاء، 4 أغسطس، 2009

صعب والحياه من غيره راحه!!(تحديييييييييييييث

تحديث....
مبدئيا كدا انا التعليقات المره دي خلتني استغرب جدا
دي مجرد حاله ياجماعه وبنقلهالكم وفيهاا جزء من فيلم بحبه جدا
موصل الاحساس اوي....
ده كل الموضوع؟؟؟
الللي بيقول دا مين؟؟؟مش فاهمه
دا احمد السقا,تامر عاشور...مش فاهمه قصدك على مين
هو عموما الحاله دي لاي حد حاسس بمراره الجرح مش اكتر.....
*******************************
أهي جت كدا وحبيته باعني....
راح وساب قلبي وخدعني......
وكل يوم بتمنى يعني...
أعيش هواااه.....
أيوه صعب أعيش حياتي
وكل يوم هو في حياتي...



الجمعة، 31 يوليو، 2009

المج اتكسر؟؟؟


كمحاوله مني لعمل نعناع لمحمد قبل ماينام
كنت قاعده على الكمبيوتر في الاوضه عادي
محمد دخل منار اعمليلي نعناع سخن..
ليه تعبان ولا ايه؟؟؟؟
لا حاسس اني متوتر عايز اهدى اعصابي شويه..
حاضر ثواني بس وقايمه...
اعملك سندوتش طيب ؟؟لا مش عايز
خلاص انا غلطانه....
حاطه المج وده بتاعي اللي بجد
من سنتين وانا بشرب كل حاجه فيه....
بصب النعناع والاقيه وقع على رجلي سخن جدا
خدت بالي ان المج فيه شرخ ووقع النعناع....
مش مهم النعناع
على قد ما المج اتكسر.....
محمد بيقولي مالك حاجه اتكسرت ولا ايه
قلتله المج؟؟؟
قالي والنعناع؟؟؟لسه هتعملي تاني
قلتله هو ده اللي هامك....
خلص الكلام وانا الان بدون مج....
****على فكره/انا بعشق جدا المجَات
سلام بقى عشان هقوم عايزه انام ولسه هاكل عشان جعانه
بس مش هاشرب نعناع.......
ولا عايزه اهدي اعصابي..............
وبس كدا تصبحوا على خير

الاثنين، 27 يوليو، 2009

.......كلام كتير


بجد بجد بجد أنا بشكر كل من قال ألف مبروك لمحمد أخويا

وعقبال يارب ماأهنى كل حد فيكم بحاجه عايزها واتحققت....

******************************


على قد مالحمد الله امتحان الجلديه كان ظريف....على قد مانا اتعودت خلاص على اللي بيحصل

في كليتنا....بقى شئ طبيعي عندنا.....أكيد معظم الناس هتقول احنا لو مكان الناس دي كنا هنعمل كدا

حد يرفس النعمه؟؟؟؟؟؟؟


بس انا لما اتحطيت في موقف زي دا نسيت الفكره الحمد الله واتوكلت على ربنا............

والحمد الله جت التوزيعه بتاعتي مع لجنه تمام يعني اتعاملت زيهم..............


*************************


البعد عن الشبهات شاغللي بالي الايام دي وعندي لخبطه كتير وتضارب افكار رهيب

في حجات مفروض انها كانت عمرها ماتشغلي بالي.....

*******************


كنت واخده على نفسي عهد أساعد واحده صاحبتي في حاجه معينه


مزعلني إني ماقدرتش مع اني حاولت كتير......


الظروف كلها ماكانتشي في صالحي.......


وهي كان كل اعتمادها على ربنا بعدين عليا......


هي مش زعلانه مني بس على رأيها كفايه عليكي شرف المحاوله.!!!


*****************



أتكلم بصراحه ولابلاش؟؟


محتاره أوي .من طبعي مابتكلمشي عن نفسي كتير او بالأصح عن حاجه مضايقاني


وحتى بعد الضغط الكبير.....جه الوقت اللي لما اتكلمت فيه ندمت وعرفت قد ايه أنا عيله...


وكنت ناويه مااقولشي ورجعت في كلامي...........بس غصب عني طلع الكلام مني......


ساعات بقول أنا غبيه كدا ليه.......ساعات بقول أنا مزوداها حبتين.......ساعات بقول


في ناس كويسه اننا نثق فيهم ومايخونوش الثقه دي.......ساعات بقول كبري دماغك؟؟؟


***************


وصلاني مسجات كتير.....حلو برضو ألف مسج بجنيه.........


بس مش حلو خالص لما تعرف ان المسج ده وصلك عشانه ببلاش....


وعشان صاحبه مش خسران فيه حاجه........وعشانه عايز يخلص الالف مسج بتوعه.....


أكيد طبعا مش الفكره ان مفروض نخسر...بس على الأقل بلاش نضحك على بعض......


مش هاشترك خالص.....!





الأربعاء، 22 يوليو، 2009

مبروووووووووووووووك

(تتشرف كليه الصيدله جامعه طنطا بفخر شديد جدا لم يسبق له مثيل ولن يسبق له مثيل
بتخريج الدكتور (محمد نصر فايد) لعام2009_2010
وذلك بتقدير عام (جيد)......مع العلم ان الدكتور محمد هو الاخ التوؤم للدكتوره المعروفه
والغنيه عن التعريف(منار فايد).......
__________________________
طبعا انا مبسوطه جدا جدا النهارده محمد حبيب قلبي ونصي التاني وتوؤم روحي
اتخرج النهارده بتقدير عام جيد وبقى دكتور ربنا يحميه يارب.....
الف الف مبروك ياحمودي.....وخمس سنين عدوا بسرعه جدا.......
وبالمناسبه دي بقى ولمده اسبوع سيتم خصم 60% على اي منتج من صيدليات محمد فايد....
ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ
يارب مايحرمني منك ابدا........ويسعدك يارب ويوفقك ويخليك ليا
وافضل معاك علطول وماتبعدشي عني......
وتبطل شرب قهوه كتير وتاخد بالك من نفسك.......
ويارب يرزقك باجمل واحده تتمناها ويسعدك معاها يارب
وتجيب بنوته وتسميها منوره..........

الجمعة، 17 يوليو، 2009

ماهوش بيتك....


ماهوش بيتك....

ومش ممكن في يوم أبدا

يكون قلبي في يوم بيتك....

ومن الأخر وجايبالك ,,

ومش عايزه اقولهالك

دا لو حصلت في يوم إني هسيب بيتي

فمش ممكن في يوم يقدر

يكون قلبك في يوم بيتي

.............

ولو طالت بك الوقفه على بابه

فمش ممكن في يوم يقدر

يفارق قلبي احبابه.....

..........

اكيد بيتك ماهوش بيتي

وجايز أحلى من بيتي

لأنه ساعات نكون شايفين

صوره حلوه وبرواز شيك

ونيجي نركب البرواز على الصوره

تتوه للصوره معالمها

وتتمنى تعيش تاني

بدون برواز مقيدها.....


أنـــــــــــــا بيتي(حبيته) و(حسيته)و

وياما سنين ومن قلبي

_اتمنيته

ولما لقيته كنت أنا لسه مش عارفاه

ولما دخلت من بابه

لقيت قلبي بيهمسلي

دا أكتر بيت انا حابـــــــــاه

وقلت أنا في بالي ساعتها

دي أول حاجه هاعملها

هاجيب برواز للصوره

عشاان تفضل كدا وياااااااه
..................

أنا نفسي وبدعيلك

وفي كل دقيقه بدعيلك

,,,, ومن قلبي

تلاقي في يوم طريق بيتك

عشان تتبروز الصوره

وده بإيدك

..................
ومش صعبه

لأنه معاك قلب جميل

ومش كارهاك ومش حاباك

لان إنت أكيد وأكيد

هتعرف بيتك من ملايين

وتندم انك مالقتوش وماعرفتوش

لانك كنت عنه مغمض وماشفتوش....

....................

السبت، 11 يوليو، 2009

هيفضل حلمي جوايا ومش هيموت....


مبسوطه أوي لما عرفت ان خالتي في الكويت اكتشفت مدونتي.....

واللي مفرحني اكتر انها لقتها لوحدها......ويارب تكون فعلا حاجه فرحتها زي مابتقول....وماتكونشي اتريقت كتير...

بعد كدا انا ممكن اعمل رسم دخول دولي....(للكويت بس)

انا بسلم عليها جدا لانها ان شاء الله هتقرا البوست....وحشتوني كلكم ويارب تنزلوا مصر وأعرف اشوفكم....

ويارب لو قريتو البوست لو تعرفوا تسيبو الميل في تعليق عندي....

___________________________________

بوست المره دي بقى يارب يكون فيه شويه امل وتفاؤل.......

خصوصا في ظروف عكسيه تماما امتحان باطنه بكره......

ويارب يعدي كويس؟؟؟

ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ

**ولو كل البحور ضدي

هيقدر مركــــبي يعدي

لأضيق نهر......هيهدَي


**ولو عادنتني دنيايا.....

وزادت حزني جوايـــــا

هيفضل حلمي جوايــــا


**مادام قلبي على الدنيا ماهوش ملهوف

أنا هاقدر أحقق كل أحلامي,,,,ومن غير خوف

وبذره وردتي هتكبر,,,,ومن غير شوك.

ويملى نداها كل الكون....


**ومش لازم في أقصر وقت أحقق أنا كل أحلامي

تعدي سنين ومهما تفوت...

هيفضل حلمي جوايا ومش هيموت....



(أستودعكم جميعا الله الذي لاتضيع ودائعه)