السبت، 27 يونيو 2009

كل ده حصل النهارده....


يوم غريب النهارده بالنسبه لي,وغريب جدا كمان مع انه بالنسبه لأي حد عندنا

فهو يوم عادي جدا لان ماحصلشي فيه اي حاجه غريبه...

النهارده كان احساسي مختلف جدا عن أي يوم تاني.....

قمت الصبح بدري ولوحدي بدون اي تفكير مسبق جبت ورقه وقلم

وقعدت اكتب في وصيتي؟؟؟؟؟

أنا نفسي مستغربه انا ليه عملت كدا النهارده

لقيت نفسي بكتب حاجات كتير أوي... واعترافات كتيره

وتفسيرات لحاجات ,,,وعتاب وسلام وأرقام

لقيت نفسي بكتب حاجات أنا نفسي كنت نسيتها

وكنت حاسه اني مستعجله أوي وانا بكتب....

وشرحت حاجات كتير كان نفسي اشرحها من زمان

وصارحت نفسي بكل حاجه وكتبتها....

خلصت وحطيت الورقه في ظرف وكتبت عليه

(يفتح هذا الظرف بعد وفاتي)

وعنته في مكان معين..ورجعت كملت نوم تاني...

ليه أعمل كدا النهارده بالذات مش عارفه......


***كهرباء قاطعه معظم اليوم عندنا النهارده

حسستني فعلا إن اليوم غريب ومختلف...

ولما كنت بقولهم في البيت كمان تقطع الكهرباء النهارده

مش كفايه؟؟؟؟

ماما تقولي كفايه إيه؟؟؟هي أول مره يعني تقطع الكهرباء....

مش عارفه ليه النهارده كنت حاسه إن الحياه مختلفه جدا

حتى في أبسط تفاصيلها...


***دلوقتي بقى أهم حاجه عندي ماازعلشي حد مني خالص

أيا كان سبب الزعل وأيا كان هو مين؟؟؟؟

بقول في بالي مادام ماقدرتش أكسب حب اتمنيته,

فبلاش أكسب كراهيه أو زعل حد مني.........


****غيرت مكان كل حاجه عندي في الأوضه

من الأخر قلبت الأوضه محاوله بسيطه مني لكسر الروتين......


***عرفت حد جديد في حياتي,,,صديقه جميله جدا

فرقت معايا بجد إني عرفتها وليه كدا سبحان الله حسيت

إني أعرفها من زمان....

والكلام ده منها كمان.... وده في وقت قصير

ودي حاجه بالنسبه لي مش عاديه خالص......


****آخر حاجه ,,حاجه حساها أوي النهارده....

مش العذاب أبدا نتمنى حاجه مانلاقيهاش,,

نتمنى حاجه ماتجيلناش,,,,

العذاب الأكبر لما نلاقي الحاجه دي فعلا وتبقى قدامنا

بس مش قادرين نقرب ناحيتها,,,,,

لأننا خايفين,,,

مع إن احنا كان نفسنا فيها من زمااان........

النهارده بالذات حسيت براحه كبيره لما كتبت البوست.....

الجمعة، 19 يونيو 2009

مبروك لمصر فوزها على ايطاليا؟؟؟؟









فرحــــــه انا عن نفسي كنت محتاجاها جدا وجت في وقتها اوي

ومتهيالي اي حد فيكم محتاج يفرح الوقت ده بالذات

كل واحد ينسى الامتحانات وينسى النتيجه

وينسى اي حاجه خاااااالص...أنا عن نفسي نسيت الباطنه
ونسيت اي حاجه قدام الفرحه الكبيره.....


الف الف مبروك لمصر.........وربنا يحميهم يارب فراعنه بجد...


المباراه كانت صعبه جدا بس بتوفيق ربنا الحضري عمل اقصى حاجه ممكن تتعمل

وحمص حمص حمص على راسنا كلنا....

اجمل حاجه كلنا نفتخر بيها اننا مصريين وبنحب مصر


ويارب دعواتكم كلكم نكسب امريكا باذن الله..........

أنا فرحااااااااااااااااااااانه


الخميس، 18 يونيو 2009

البوست باختصار...أنا بقدم اعتذار



البوست باختصار....... أنا بقدم إعتذار

لحد زعلان مني اكيد.......

وانا في حياتي والله العظيم عمري ماقصدت أزعل حد مني خالص

وخصوصا ..حد جميل اوي .يستاهل كل خير

انا ماعنديش اي كلام اقوله خالص

وماعنديش كمان اي جرأه اخد اي خطوه

اكيد انا الغلطانه من الأساس...

عندي احساس قوي بكدا

وفي نفس الوقت ماعنديش دليل على كدا..

ماعدتش عارفه ايه اللي بيحصل؟؟؟؟؟

حاجات كتير اوي بتحصل في وقت قريب اوي من بعضها

بتحطنا في مواقف صعبه اوي اوي....
مش عارفه ايه اللي هيحصل بعد كدا وبجد كمان
انا بقيت خايفه اوي ياترى القدر ممكن يكون مخبيلي ايه؟؟؟

الاثنين، 15 يونيو 2009

الدنيا بالألوااان....


أنا كل يوم عايشاه.....بقابل ناس كتير
شايفاهم بالألوان....
أبيض وقبله سما...كتاب وصفحه بيضه.....
يحسسك بالنور...عايشين والحال مستور.....
ويــــــــــارب يدووم ويدووم...
ومادام إديتنا الصحه....فالباقي كله يغور...
أعظم سلام للأبيض
أبيض بقلبه الأبيض
وأبيض بعمله الأبيض...
ــــــــــــــــــــــــــــــــــــــــــ
وتاني حد بهتااان
عايش في الدنيا غلبان
ومش فارقه معاه ألوان
شايفها حاجه واحده..
تعبان شقيان وجعان
ويارب اكفيني بالحلال
صعبان عليا البهتااان
عاش طول عمره غلبان
ولا عمره في يوم هيبان...
ـــــــــــــــــــــــــــــــــــــــــــــ
وعالم تاني عايشه..ودي عايشه ومش عايشه
ولا فارقه معاهم من الاساس
كرامه ناس تنداس؟؟
هدفهم حب الذات....على حساب ذات وذات
شايفين الدنــــــيا دي ملعب
والكوره فيه تتشاط
مش دوري وبس لكن
ده وصووول للنهائيات
وبطوله وميداليه
فضيه ودهبيه...
محتاره من دي ناس
بنفوسهم قتلوا الخير
وعاشوا في وسط الغير
وعليكي يادنيا سلاااااام
ـــــــــــــــــــــــــــــــــــــــــــــــ
وبشوف واحد كماااان
بيلعــــــــــــــــــب بالألوان
يسلم ملـــــــــيون سلام
وياخدك بالأحــــــــــضان
أنا كويس وكله تمام...ومش مصدق عنيا كمااان؟؟
وكمان نص دقيقه..
تلاقيه قلب زعلان
وعلى خاطره واخده كمان
وهزاره تقيل وبايــــــــــخ
ويرمي في الــــــــــــكلام....
غريب حال دي نــــــــــــاس
حياتهـــم شــك ولووم
مليون شـــــكل ولوون
ومزغلل ومش بيبااان...
ــــــــــــــــــــــــــــــــــــــــــــــ
ــــــــــــــــــــــــــــــــــــــــــــــ
أنا بس بكتب ده..عشان بقالي كتير..
بتحصللي حاجات جديده...ولاباخد منها بالي.....
وحاجات أصلا في بالي...
موجوده من الاساس....ولا واخده منها بـــــالي....
وحاجات بقالها زمان...مقفوله بالترباااااس.....
وعليها كووم غبــــــار...متبعتر بالنــــــهار....
مرميه في وســـط ورق...مليانه هم وقلق......
وكلام عن ناس وناس...مأثر في الإحساس....
مليون حاجه تلاقيها...تديك احساس أمان.....
وحاجه واحده بس...ترجع بيك نفس المكاان...
تملى قلبي مليـــــــــــــــــــــــــــــان
وأكيد مش زهقـــــــــــــــــــــــــــان
مع إنه شويه تعبــــــــــــــــــــــــان

برضو شايفاكي لسه يادنـــــــــيا بالألواان....

الأحد، 7 يونيو 2009

ذكرى مدرسه الأحياء....


الحمد الله رب العالمين انا كويسه وبذاااااااااااااااكر وزهقت...انتم ماسالتوش بس انا برضو بطمنكم عليا.......

نفسي الشهرين دول يعدوا بقى والاقي نفسي خلصت سنه خامسه.....انا والله مش زهقانه من المذاكره ولا الكتب ولا الكلام ده

الحاجات دي بالنسبه لي مابقتشي بتاثر فيا...انا كل اللي بيزهقني المده الطويله اللي بقعد انا والحياه والكتب...

ربنا يعدي يارب الامتحانات على خير عليكم وعليا وعلى اللي لسه هيمتحنوا.............

ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ

أنا داخله النهارده اكتب بوست اتمنيت اكتبه من زمان واتمنيت اكتبه كل يوم عشانه بخصوص حد بعزه جدا جدا

عنوان البوست(ذكرى مدرسَه) وده بخصوص اجمل حد بحبه وبعزه مدرسه الاحياء اللي كانت بتديني في السعوديه...

انا فاكره والله اول مره شفتها فيه طبعا وبلا فخر انا اول انطباع باخده عن اي حد بيبقى انطباع غلط ومش عارفه ليه؟؟

ماكنتش عارفه هي رخمه ولا هاديه ولا كئيبه ولا خنقه ولا سوسه ومش باين...؟؟؟؟بس الغريب اني عمري ماشفت فيها حاجه كويسه ابدا....(دي مشكلتي اللي نفسي اغمض عيني وافتح ومالاقيهاش فيا)...


الايام عدت واكتشفت انها اطيب وانقى قلب ممكن حد يقابله ويحبه من كل قلبه ويتمناله كل الخير..

ومتهيالي مش انا لوحدي اللي كنت بحبها...مش لاقيه حد ماكانشي مابيحبهاش..انا داخله المدونه النهارده عشان اتكلم عنها...

البوست ده مفروض كان يبقى اول بوست اكتبه في المدونه بجد.....قد ايه بجد الانسانه دي وقفت معايا...

لو قلتلكم انها كانت اختي فهي اكتر،لو قلتلكم كانت صاحبتي فاكيد اكتر،لو قلت انها كانت مدرستي فبرضو اكتر...

عارفين انا ماكنتش بصدق ان انا استاهل كل اللي بتعمله معايا.....اتمنيت كتير اوي اني كنت اقابلها قبل كدا...

ايام ثانويه عامه وستريس الامتحانات كانت دايما واقفه معايا ولازم تكلمني وتهديني ونهزر ونضحك

بعدها تقلب جد وتزعقلي.....قبل ماادخل اللجنه الاقيها جايه وتهزر معايا وتتنرفز اوي لو شافت كتاب في ايدي...

تقولي اني هتموتي وانت في ايديكي كتاب...حرام عليكي....وتقرالي الادعيه وتفضل واقفه لغايه ماادخل....

اطلع الاقيها مستنيه بره ومعاها مدرسه الماده عشان تراجع معايا اجاباتي....

اكتر حاجه فرحتني بجد لما سمعت كلمه مبروك منها....كانت أهم حد يكلمني ويباركلي .....

انا كنت حاسه انها كانت فرحانه اكتر مني....

اكتر حاجه مزعلاني اني مشيت من السعوديه اني مش هشوفها تاني..واجمل هديه بجد وصلتني كانت منها.....


وكانت دايما تقولي ايه يعني تسافري مصر مش بعيده كلها ساعتين طياره ليه مسمياها سفر؟؟؟؟

احنا الحمد الله مازالت علاقتنا بس في حدود التلفونات بس...انا بجد بتمنى اشوفها تاني

وفاكره دايما لما كانت تقولي انها هتحضر فرحي...وانا مااصدقهاش واقولها استحاله

تقولي هاجيلك قبلها لانها اصلا هتزور مصر عشان جوزها بيعمل ماجستير هنا....

ـــــــــــــــــــــــــــــ ـــــــــــــــــــــــــــــــــــــــــــــــــ ــــــــــــــــــــــــــــــ
المهم تقولي ريحيني وريحك نفسك وانا اجوزك اخويا...

انا عملت حاجات كتير عشان كل اجازه اقدر اشوفها بس ماعرفتش ولا مره


كنت دايما بدعيلها تتجوز الانسان اللي بتتمناه وبتحلم بيه وربنا كرمها الحمد الله

وكلمتها بعدها قالتلي انها سعيده ومش عايزه حاجه تاني اكتر من كدا.....


بس ربنا مابيديش كل حاجه ودي دايما الجمله اللي بيتبقى دايما قالقاني

ربنا اداها حب الناس وحب جوزها ليها وقبل ده كله اكيد ربنا بيحبها عشان كدا حبب فيها كل الناس دي...

بس لحكمه من عنده ماادهاش اطفال.....انا حاسه جدا بيها حتى لو مااشتكتشي واخر مره عرفت ان استمرار حياتها مابقاش اكيد

بسبب ده عرفت وقتها ان الحب مش كل حاجه؟؟؟

وده سبب اني كتبت البوست حالا..............

برجوكم جميعا اي حد يقرأ البوست النهارده يكمله للاخر ويدعيلها ربنا يرزقها بالاولاد اللي يعوضوها ,ويملوا عليها حياتها...........

وشكرا ليكم كلكم


ـــــــــــــــــــــــــــــــــــــــــــــــــــــــــــــــــــــــــــــــــــــــ

(استودعكم الله جميعا الذي لاتضيع ودائعه)