الأربعاء، 25 فبراير، 2009

لا بحبه ولا بقدر على بعده؟؟


بدايه كدا أي حد يقرا البوست دماغه لا تروح هنا ولا هنا؟؟؟؟

ماتخافوش ((انا حياتي بلا حسن))..

البوست ده لعيون الباطنه اللي خلصت النهارده وكان الامتحان..وزي مابدات زي ماخلصت مافيش فرق خالص..

جايه مبسوطه وجايبالكم مسرحيه بتتعرض عندنا في البيت علطول...بيني طبعا وبين حبيبه قلبي(سوسه)

وهي طبعا اسم على مسمى..هتسالوا هي مين ((مخدتي)) اللي لابحبها ولا بقدر على بعدها

ــــــــــــــــــــــــــــــــــــــــــــــــ

انا/وحشتيني ياعمري معليشي كان عندي امتحان الصبح.على عيني وانا سايباكي.بس وحشتيني

سوسه/اااه طبعا طبعا ماهو باين حتى بالاماره اللي حصل بليل

انا/الف سلامه عليكي ايه اللي حصلك؟

سوسه/استهبلي يااختي واعمليهم عليا

انا/انا/لا بجد قولي بس انا عملت مصيبه ولا ايه؟؟

سوسه/ابدا ابدا ولا حاجه خالص ضرب الحبيب بقى.......دي جزاتي وانا ياما وقفت معاكي في المره والمره اخرتها بترميني على الارض..ماااااااااااااااشي كله عندالله هو عشان السرير سريرك..ربنا يسامحك

انا/لازم ارد طبعا واطلع نفسي زي الشعره من العجين...بس كدا ياسوستي ياحبيبتي هي أول مره ولا أول مره؟؟

وبعدين دا انتي ياما استحملتيني طبعا برد وبتدفيني..وخناقه بتنفعيني...(المخدات عندي ليها استخدامات ياما)

سوسه/ماااشي خلاص هاعيط.المهم هتنامي امته النهارده اصلك وحشتيني جدا جدا

وبتقول بصوت واطي(اما كنت اطلعهم عليكي)

انا/مااتخافيش النهارده امتحنت بقى ومافيش ورايا غيرك ياجميل

سوسه/ها وعملتي ايه؟

انا/كالعاده طبعا بدعت

سوسه/هي عادتك ولا هتشتريها وبصوت واطي(دا ذنبي)

انا/بتقولي حاجه ياسوستي

سوسه/لا ابدا بكح

انا/ماااشي بحسب ابقي اترزعي بقى على السرير لغايه مااجيلك..صدعتيني.وشكلك كدا خدتي عليا وده كتير..

سوسه/طبعا بليا جه ولقيتها بتقولي وانا جايه انام لسه فاكره ياهانم.ماكنتيش ناويه تتخمدي ولا ايه؟

انا/كان ورايا حاجات كتير انتي عارفه بقى اخويا مسافر الاقصر واسوان وانا اللي اتدبست في تجهيز الشنطه ورص الشرابات

سوسه/بجد والله وهايقعد اد ايه؟

انا/اسبوع وعشان كدا انا زعلانه

سوسه/ماتزعليش يروح ويرجع بالسلامه.على فكره ماتنسيش قبل ماتنامي تقفلي ام الموبايل بتاعك مابيبطلشي رن

انا/بضحك بصوت عاااالي الحقد الطبقي هيبدأ

ـــــــــــــــــــــــــــــــــــــــــــــــــــــــ

ويستمر الحال كل يوم..خناق معتاد ويطلع الصبح وبصراحه برضو بتوحشني جداااا سوسه وخصوصا وانا قاعده في الراوند

وعلى رأي المثل:::(لا بحبه ولا بقدر على بعده)

الثلاثاء، 24 فبراير، 2009

حاجه غريبه؟؟؟



انا بصراحه تعبانه


مافيش حاجه بتوجعني


بفكر كتير وقلقانه


ومش لاقيه حد بيسمعني


حاجه غريبه حصلالي


ماعرفشي بجد تبقى ايه


ولا انا عارفه اوصفها


ولا كمان اسميها ايه؟؟؟؟؟؟؟؟؟

الخميس، 19 فبراير، 2009

ايه اللي بيحصل في الميكروباص؟؟؟


النهارده انا هحكيلكوا على شويه حاجات مفرحاني.....وبالظبط مواقف مفرحاني

يمكن بالنسبه لاي حد فيكم ممكن تكون حاجه هايفه او ماشابهه...بس عموما هاحكيها برضو...

اولا___موقف جميل جدا بشوفه كتير وكتير مننا بيشوفه بس بصراحه النهارده بالذات حسيت اني لاول مره في حياتي اشوف ده بيتعمل

وانا رايحه الكليه عادي زي كل يوم وراكبه المواصلات وزي كل الناس ساعات السواق كل الفلوس اللي بتوصله بتبقى مجمده وعايز يفك الفلوس...ونلاقى العباره المشهوره:(اللي معاه فكه يطلعها مش معقول احنا لسه الصبح)اللي حصل بعدها ان مافيش فكه خالص نلاقي عربيتين قربوا من بعض وباشارات غريبه مابينهم السواقين يعني بيطلب منه فكه عشرين وقربوا العربيات من بعض عشان يطلع التباع ياخد من السواق ويديله وبسرعه رهيبه جدااا.وثواني وكل واحد فيهم يمشي في طريقه عادي...اللي عاجبني بجد النهارده وحسيته إني حسيت فعلا ان الناس اخوات حتى لو كانوا مايعرفوش بعض...يعني الموضوع في منتهى السهوله لما ساعد زميله السواق وفكله الفلوس بتاعته.......

حاجه بقى غلط فعلا كتير مننا بيعملها وانا عملتها مره لما حد يطلب مننا فكه خمسه او عشره نلاقينا ساكتين وماحدش بيرد.على الرغم ان كتير مننا معاهم بس مش عارفه بصراحه ليه؟؟؟؟هو كسل‘‘‘ولا مش عايزين يساعدوا فعلا‘‘‘ولاكل واحد يقول وانا مالي....



تاني حاجه___ده موقف حصل في المواصلات برضو بس من مده شويه....انا افتكرته فعلا لاني اصلا مانسيتهوش..سبحان الله فعلا لما حد بيعمل معانا الواجب وبدون اي مقابل وبدون مايكون يعرفنا ومن منطلق الشهامه بنفرح اوي ونحس فعلا(( ان الدنيا بخير))

ببساطه جدا كنت راكبه انا وواحده صاحبتي ورجاله قدامنا كبار يعني بصراحه اد اباهاتنا.المهم العربيه فتح الشباك فيها واحد من اللي راكبين والهوا بقى بيطير العربيه .بنحاسب وبندي الاجره للراجل اللي قدامنا خد مننا الفلوس وطلع الموبايل يتكلم فيها قام الهوا طير الفلوس برا العربيه...طبعا الراجل مش عايز يدفع من معاه الفلوس اللي طارت منه بتاعتنا...وكل ده احنا مااتكلمناش ولا كلمه...زي ماماما دايما بتدعيلي وانا طالعه(ربنا يوقفلك ولاد الحلال في طريقك) الدعوه المشهوره لمعظم الامهات...ربنا استجاب دعوه ماماوقام شاب كان قاعد جنبنا غصب الراجل انه يدفع الفلوس واتخانق معاه وخلاه في الاخر عمل اللي عايزه وجابلنا الباقي كمان......هههههههههههههههه

(رائع ان نساعد شخص ما والأروع ان نساعد شخص لا نعرفه)))

الاثنين، 9 فبراير، 2009

جمال وحنـــــــــان


في يوم من الايام

حصل احلى كلام

بين بت جميله خالص

وواد امور كمــــان


في الاول كان بيشوفها

كتير اوي في المحاضره

ولما يجي يكلمـــــــــها

يتلخبط في الكلام


ويقف قدامها كتير

يتكلم في كل حاجه

ولما يجي يصارحها

يرجع في الكلام


وفي يوم من الايام

جمال شاف حنان

مضايقه اوي وتعبانه

وشكلها زعلان كمان


جمال اتقدم خطوه

وقلبه دق كمان

ياترى ايه اللي حصل

وممكن يزعل حنان


قرب جمال عشان

يطلب يكلم حنان

وحنان واقفه بعيد

ونفسها يجي جمال


قالتله خلاص ياجمال

انا مسافره خلاص مكان

ومش عارفه هارجع امته

ولا عارفه ايه اللي مكتوب لحنان


جمال اتاثر خالــــــــــص

وخدهــــا في حضنه كمان

وقال يارب ليه انا كدا

مش مكتوبلي احب حنان

ياااااااااااااارب


يارب اجعلني صــادق

واقول الحق لو كان مُر



علمني ماسمعشي إلا

صوت ضميري الحر



خليني بسمه حـــنان

كلمه سلام وحـــنان

رحمه وعزيــــــــمه



وعمل نافع يفيد مايضر