السبت، 25 أبريل، 2009

اخيراً وصلني تاااااااج


الحمد الله لي عوده.بعد انقطاع مده اسبوعين عن التعليق انا كنت بقنع نفسي ان انا مشغوله.بس انا كنت بنوي كتير اقعد واكتب اللي بالي

بس مش في بالي حاجه معينه اكتبها...اقوم اقفل الجهاز واقوم...

لغايه ماوصلني التاج من manoooosh

وبصراحه الحمد الله التاج ده جه في وقته ....

يارب اتمنى فعلا الاجابات تعجبكم وتعرفوني من خلالها اكتر وماتكونشي يارب اجابات مكرره

يالله نبدأ

............................................................................................................................

إسمك؟؟

منار نصر فايد

المشهوره بيه وسط اصحابك؟؟

اصحابي بيقولولي علطول نونو او منوره

في البيت بقى خد عندك خصوصا ماما.... بنوره من ماما.بنوره من بابا.كوسو من الاتنين

سنك؟؟

كمان خمس شهور إلا يومين يبقى عندي 22 سنه

مجال دراستي؟؟

خامسه طب..مش هاقولكم بقى إن ده كان حلم حياتي من صغري والكلام ده.بالعكس خالص

أنا عمري ماحلمت في يوم من الأيام اني ممكن ابقى دكتوره..دخولي الكليه لاكان برغبتي ولا كان برضو برفضي

ده تحقيق لأمنيه ماما وبابا..بس الحمد الله اكتشفت ان ربنا دايما عايزلنا الأحسن..

اسم مدونتك؟؟

ايه ده معقوله بتقرا ومش عارف اسم المدونه اللي بتقراها...

مدونتي اسمها (شباك موارب).على فكره انا عاجبني الاسم كمان اكتر منكم

ومستغربه ايه اللي جاب الإسم ده بالذات على بالي...بس انا كنت بفكر في مدونه لأي حاجه ولكل حاجه

اكتب فيها اللي مفرحني في يوم او اللي مزعلني في يوم....وانا مبسوطه جدا اني عملتها لاني حسيت اني بقيت مسؤله

عن حاجه معينه لو حدي..وهمي اني اكتب حاجه تعجبكم واشوف ده في تعليقاتكم..

المدونه بتاعتي مش مدونه شخصيه بالعكس هي بتاعتكم قبل ماتكون بتاعتي....

بالمره بقى نفسي أغير القالب بتاعها وأحط قالب من تصميمي وانا دلوقتي في مرحله المحاولات...

الصوره الرمزيه بتعبر عن إيه؟؟

الصوره بتاعتي صوره بنت ماسكه ماج وبتشرب شاي او نسكافيه حكايه بقى حرف الأس اللي مكتوب ده

مالوش اي حكايه مجرد مكتوب بس على المج اسالوا البنت دي ماتسالونيش,.,,,,

عاجبني اوي هدوء البنت وروقانها بتفكرني بنفسي في أيام الروقان....

هل فكرت في إغلاق المدونه والسبب؟؟

حرام عليكم هوأنا لسه لحقت أعمل أو أكتب حاجه دا أنا لسه بقول ياهادي...

الحمد الله عمري مافكرت اقفلها..متهيالي انا احسن ليا انقطع فتره عن الكتابه أحسن ماقفلها..

نفسي لو قررت في يوم اقفلها أجيبها كدا كلها من أولها لأاخرها واطبعها واخليها عندي

مش عارفه دايما عندي الاحساس ان هيجي وقت النت فيه هيبقى ولا حاجه يمكن يطلع وقتها حاجه تانيه..

جايز بقى في يوم من الايام اجي ادور عليها مالاقيهاش...

إيه ردت فعلك او حد قل أدبه عليكي في تعليق؟؟

الحمد لله ماحدش عمل كدا معايا...هو انا شويه ولا إيه....

انا في الاول ماكنتش حاطه الإشراف لأني ماكنتش اعرف ان في حاجه كدا

بس اول ماعرفته حطيته علطول..عشان حاجه من دي ماتحصلشي خالص

لكن لو اعتراض وجهات نظر مافيش مانع خالص من نشره

انت سؤالك على حد قل أدبه عليا.....

أسوء مدونه؟؟

ماقابلتهاش لسه...ممكن مدونه ماتعجبنيش بس مش معنى كدا إنها سيئه

هيحصل إيه للإيميل بتاعك لما تموت؟؟

ولا حاجه هيموت زي ماصاحبته ماتت

بس تصدق بالله أنا فكرت كتير في الموضوع ده قبل كدا

وفكرت بقى اكتب الإيميل والباسورد بتاعي في الوصيه قبل مااموت..

إمال إيه؟ عشان الناس تعزي..

إديت الباسور بتاعك لحد؟؟

واحد بس محمد اخويا..وأكيد مش ناويه أديه لحد خالص

اكيد لما أتجوز هاديه طبعا لجوزي..

بس حاليا محمد وبس وأنا كمان معايا باسوورد ايميله..

السفر بالنسبه ليكي إيه؟؟

انا بحب اوي اوي السفر..مش شرط لبلد تانيه..ممكن لمكان جديد في مصر ..

متهيالي كل الناس بتحب تسافر..أنا بقى بحب السفر بس بشرط مايطولشي عن شهرين..

ببقى مبسوطه أوي لما بقضي الإجازه في السعوديه بس لما نطول هناك بزهق جامد وبتوحشني مصر..

بحب السفر كطريق بغض النظر عن المكان اللي رايحاه.ورايحه أعمل إيه..

بحب أوي أخد صور مع الناس اللي مسافره معاهم سواء كانو قرايبي اصحابي ..

بحب أوي الوقت اللي بقضيه في مكه..أجمل وقت قضيته هناك..ولازم كل مره اتوه فيها ايام الزحمه

بالمناسبه بقى.أنا اقولكم انا سافرت فين..السعوديه,الأردن.طنطا.القاهره واسيوط كمان.

المود بتاعك؟

مودي حاليا مستقر...تلاقيني في ثانيه اتغيرت 180درجه..

من الاخر مودي سريع التقلب...

الأكله المفضله؟؟

أنا عموما مش أكيله أوي..بس مش معنى كدا مابحبش اكل..

بعمل اعمل الأكل أكتر من إني أكله..

بحب المحشي بتاع ماما تيتا,وكمان المكرونه الأسباكيتي والفراخ المشويه

وعموما أي حاجه مشويه..

بعشق حاجه إسمها حلويات..بمختلف أنواعه..بحب أوي أي حلا معمول ببسكوت الشاي..

بحب الفراوله جدا جدا..وكمان بحب أشرب نسكافيه

الصفات التي ورثتها عن والدك؟؟

من بابا انا واخده مش كتير..اتعلمت من بابا حب الخير.القلب الأبيض.الطيبه

الهدوء.تمالك الأعصاب وقت الغضب..حبيت كمان عادل امام عشان بابا بيحبه

وبقيت بتفرج على المصارعه عشان بابا بيحبها وبيتفرج عليها كتير..

الصفات اللتي ورثتها عن والدتك؟

ماما تقريبا أنا أخدت منها كل حاجه.وده كله بشهاده الجميع

حتى الشكل فأنا شكل ماما كمان..من ماما اتعلمت المسامحه في ثانيه حتى بعد زعل مده طويله

خدت من ماما كمان الرقه والهدوء..

-اكتر ست حاجات بكرهها؟؟

انا هاكتبهم وزي مايجوا..بكره أوي احساس الندم لأنه احساس صعب جدا جدا

كمان بكره اللوم المتكرر من اي شخص..بكره الظن السىء والحكم السريع على الناس

بكره الغرور والكلام الفاضي..

بكره التعميم في اي حكم...الظباط مش كويسين.المنايفه مش طيبين.الشعب كله حرامي

وخد عندك أي تعميم في الأحكام..بكره كمان الخيانه والتردد .بكره التمثيل

بكره الناموووووس والشمس الحاميه..

بكره سواقيين التاكسي باستثناء عشان مايبقاش تعميم..

بكره اللبس اللي بيتلبس الايام دي

بكره البنت النص محجبه نص شعرها باين..بتستفزني جدا جدا

بكره الألفاظ الوحشه اللي كل الفئات بقوا بيقولوها صغير وكبير

بكره التواكل وكلمه احنا هناخد زمنا وزمن غيرنا..لاني بحسها ضعف وعدم تحمل للمسؤليه..

أكتر ست حاجات بحبها؟؟

بعد ربنا عز وجل طبعا وماما وبابا بعد كدا طبعا

بحب الناس الطيبه.بحب اسمع دعوه من واحده ماعرفهاش

بحب أساعد الناس الغلابه مع اني مابعرفشي أعمل ده كتير

بحب أزور ماما تيتا واسمع الحواديت القديمه..بحب كمان الأطفال النونو خالص
بحب اطلع العصر في البلكونه وأبص على الاراضي الي ورا بيتنا.. والصوره اللي فوق دي من البلكونه عندي
..عندي حق ولا لا
بحب أوي اخرج مع بابا وامشي معاه وانا ماسكه في دراعه..

بحب أطلع رحلات مع اصحابي....وبحب كمان أعرف ناس جديده بس مش كتير.

بحب الشخص الواثق من نفسه

واخيرا بحب أنام كتيييييييييييييير

شخصيتك نوعها إيه؟؟

عصبيه وهاديه على حسب المزاج بس عموما عصبيه

وعلى رأي ماما خلقي في مناخيري

حديثا اتعلمت حاجه جديده إني أكبر على اي حاجه مش عاجباني

نادر كمان لما حد بيعرف ان أنا زعلانه أو مضايقه

بحب جدا اكون مبسوطه حتى بالكدب..

الشغل بالنسبه لك؟

لسه ماشتغلتش...نفسي طبعا أشتغل ويبقى ليا كياني حتى لو كان صغير

او العائد المادي قليل..

لماذا دخلت عالم التدوين؟

أنا ماكنتش أعرف أي حاجه عن التدوين خالص وكانت بدايتي كبدايه أي حد فيكم

لما كانت بتوصلني البوستات الجديده من زمايل عن النت كنت بدخل بقراها بس مش بسيب كومنت

لاني كنت مفكره انه لازم تكون عندي واحده وانا كننت لسه ماعملتش مدونه..ز

الفكره جت في بالي مره واحده عملتها كبدايه ساعدني ناس كتير كنت بسالهم دايما عن أي حاجه تقابلني

مش عارفاها...بصراحه الحمد الله عرفت ناس كتير اوي من المدونه كلهم أخواتي وانا بحبهم جدا اجدا

والحمد الله اول ماشفت اول تعليق حسيت بنجااااااااااااااااااااااح

أجمل كلمه اتقالت في وصف مدونتك؟؟

لسه ماحدش قال حاجه..كفايه عليا أوي التعليقات الجميله لان دي عندي حاجه كبيره اوي

أهميه التعليقات بالنسبه لك

نبض المدونه وعلامه استمرارها

بستنى دايما تعليقات اصحابي وبفرح أوي لما الاقي تعليقات جديده من ناس ماعرفهاش

المدونه بدون تعليقات كانها مسوده...

أحسن بوست كتبتيه؟؟

هما اتنين اول واحد بخصوص مناروالتاني اعلى درجات العشق



عجبوني اوي بعد اما كتبتهم..وظهر دا كمان في التعليقات

أجمل بوست قريتيه؟؟

كتير اوي اوي بس مش هينفع اكتبهم كلهم

أفضل مدونه قرأتيها؟؟

كتير اوي كمان بس زي السؤال اللي قبله

النت بالنسبه ليكي إيه؟؟

بدخل نت عشان كل حاجه

لو عدى اسبوع مادخلتش نت فيه بحس بحاجه ناقصاني

تمرري التاج لمين؟؟

متهيالي كل الناس وصلهم التاج وجاوبوا عليه

شكلي انا اخر واحده

عموما هابعته برايفت للناس اللي ماوصلهاش...


أنا عارفه إني اتكلمت كتير..اعملكم ايه التاج اصلا اسئلته كتيره

الخميس، 9 أبريل، 2009

فضفضه.....

اولا احب أقول لكل أصدقاء المدونه انكم وحشتوني اوي اوي اوي
وحشتوني كلكم من غير ماعرفكم
وحشتني الناس اللي بتسال على التاخير في البوست ,وبعتالي تعليقات مع اني مش عارفاهم
صحيح أنا عارفه ناس, وزعلانه أوي انهم ماعادوش بيمرو عندي
وزهقت من الأعذار....
بس ده مش معناه برضو ان حتى الناس اللي ماعرفهاش الا من المدونه بس بتهمني ارائها برضو
وبحبهم جدا..
بشكر اوي كل الناس اللي ردت على البوست اللي فات بالذات
لأنه بجد كان بوست يهمني اوي...
بعتذر اوي للناس اللي ممكن ماردتشي عليهم عشان ظروف امتحانات الباطنه الاسبوع اللي فات....
وبمناسبه الامتحان بتاع امبارح,على قد ماكنت مبسوطه او ي عشان خلاص امتحنت وخلصت من الباطنه مؤقتا
على قد مانا كنت طالعه من العنبر مخضوضه.....
انا كنت خايفه وانا داخله جدا لاني اول مره هاتعامل مع حاله لوحدي واشيتها لوحدي كمان
كرهت اوي بجد اللي بيحصل...
موضوع الفلوس ده صعب اوي..انا مش ضد اننا ندي العيانين فلوس
هما برضو غلابه وبيصعبوا عليا اوي وبيبقى في نفسي اعملهم حاجات كتير
واساعدهم بس كتير اوي بلاقي نفسي مافيش في اديا حاجه اعملهالهم.
اللي يحرق الدم بقى لما يكون واحد مش تعبان ولاحاجه.وعامل نفسه تعبان عشان ياخد فلوس
اللي حصل اني اول مادخلت على الحاله كان شاب عنده30 سنه..
ماكنتش عارفه ازاي ابدا معاه ولما يطلب الفلوس اقوله ايه او اتصرف معاه ازاي..
خصوصا انا بتكسف اوي اكلم حد في موضوع فلوس جدا...
ولما الفلوس ماتعجبوش يزعق وصوته يعلى...بتكلم بجد ياجماعه.انا عارفه اغلب الناس اللي مش طب مش هيصدقوا
بس هي دي الحقيقه...الدنيا بقت حاجه غريبه جدا...كل حاجه اتعكست..كان العيان دكتور والدكتور عيان...
انا لولا الله ثم ووقفه واحد زميل ليا كان على الحاله اللي جنبي كان زمان العيان خد مني ميت جنيه..
ولقيت زميلي زعقله والصوت علي ...............بجد انا كنت طالعه من العنبر مخضوضه
طلعت وانا حاسه اني عايزه اعيط لو كلمت اي حد..
معليشي بجد هو البوست المره دي ممل شويه او مافيهوش حاجه تشدكم
بس انا كنت مضايقه شويه ومخنوقه واستحملوا بقى......

الخميس، 2 أبريل، 2009

بخصوص منار....




انا اترددت اوي بصراحه اكتب البوست ده..بس لما لقيت البوست اللي فات كل الردود


اللي فيه طالبه كدا.حاولت اكتب عن نفسي حاجه .واكتشفت حاجه مهمه..


ان الانسان ممكن يكتب كتير اوي في كل حاجه..بس يجي على نفسه مايعرفشي يكتب ايه؟؟


يمكن عشان الانسان مابيبقاش شايف نفسه زي مالناس شايفاه...


اسيبكم..................................................


يمكن الــــــــــــنهارده


انا هاعمل حاجه غريبه


زي ماوعدتكوا زمـــان


هاحكيلكوا حكايه طويله


عن واحده اسمها منــار؟


......................................


متردده اوي وخايـــفه


وهي بتكتــــــب الكلام


ومش عارفه تكتب ايه؟


في بالها كلام كتـــــير


عايزه تقوله وتحـــكيه


بس مش حابه الإختصار


.......................................


ببســاطه شديده جدا


منار عاشـــت زمان


بعيد خالص عن مصر


بس كانت بتحلم دايما


بالليوم اللي تنزل فيه


...............................


وطول ماهي بعيد


بصراحه ياجماعه


منار عمرها ماحست


بقيمه الصداقه؟؟؟


..................................


ونزلت مصر ولقيت


أصحاب كتير اوي..


وكمان مش عارفه عددهم


وربنا يديم صداقتهم..


.............................


ظهرت(لارا) و(ليالي)


وعشان خاطر المره دي


هاقول على الأسامي


(لارا) دي تبقى ساره


و(ليالي)دي تبقى أماني


................................


حبيتهم اوي والله


لأنهم فعلا كويسين


وفضلنا سنين وسنين


ولحد االآن مع بعض


بتحصل مشاكل اه


بنتخانق كتــــــير لا


ويارب مايجي وقت


علينا ونسيــــب بعض


................................


مشكلــتي اني أذاكر


وكل مانوي أذاكــــر


الاقي مليون شـــغله


او اتلكك كتير واقوم


اعمل اي عمــــــــله


اهم حاجــــــــه عندي


(مااقعدشي كتير على الماده)


..................................


بيقولوا عليا طيبه


وكمان على نياتي


مش عارفه دي حاجه كويسه


ولا بلاش تكون في حيـــــاتي


.................................


كمــــــان أنا كـتومه


وده مضايق اصحابي


فاكريــنه قــله ثقــــه


أوحد تاني في حياتي


بس أنــــــا والله ابدا


ويارب يقروا كلامي


أنا بس شايــــــفه ده


أريح أوي لأاحزاني


..................................


فكرت في مره أحب


وياريتني مافكرت


طلع تفكيري غلط


ولقيت نفسي اتسرعت


وخلصت الحكايه كالعاده


وزعلت عليها واتاُثرت


...................................


ولقيتــــني أخدت قرار


خلاص مش عايزه أحب


ولاعايزه أعيش في نــــار


ولاعايزه تانــــــي أحب


أنا نفســي في يوم أتحب


.............................


وعدى وقت طويــــل


وانا فيه على قد كلامي


لحد ماقابلـــته صدفه


حسيت إني عايشه تاني


ولقــــيته بدون مايقصد


لخبطني وشقـلب كياني


.................................


وكان عندي أمل كبير


تنور شمعه حياتي


واسيب خلاص الضلمه


وارجع أعيش من تاني


........................................


لكن كالعاده البحته


اتكرر المشهد تاني


لقيت نفسي بحب


ومش لاقيه طرف تاني


........................................


والأصعب في كل ده؟


مطلوب مني أكبَر


وانسى ومااحطش في بالي


وأد إيه صعب عليا


أتعامل كدا مع صديق


(كان عندي في يوم غالي)


...............................................


وطلعت الحقيقه


إني عمري مافكرت دقيقه


اكتب كلام كدا......


يمكن عشان ببقى خايفه


او يمكن عشان ماجاتشي مناسبه


بس عشان خاطر الغلابه


هاكمل الدباجه


وأقول يارب يكون


كلامي كله عجبكم


وياريت افضل علطول


حد كويس في حياتكم


ومرسي أوي لوقتكم


ومستنيه كمان ردكم


الشباك خلاص مفتوح لكم


قولوا براحتكم وعبروا


وقولولي ايه رايكم؟


أنا طلعت إيه في ظنكم؟


............................................


بس ماتنسوش وانتوا طالعين


تقفلوا الشباك وراكم مرتين.....