الخميس، 26 مارس 2009

بنات تلاته......


ممكن نقابل ناس كتير اوي في حياتنا...نحبهم ويحبونا

بس للاسف العلاقه بتقف لحد كدا وبنبقى زمايل...

والأجمل بقى..

اننا نلاقي ناس كدا ونحبهم ويبقوا اصحابنا اوي..

ده اللي حصل معايا..

انا للاسف مش من السهل اوي اعرف حد واثق فيه

انا عارفه انه عيب فيا....بس انا دايما ماعنديش ثقه في الناس

مع ان الناس مش وحشه اوي كدا واكيد الناس دي احسن مني في حاجات كتير..

بس انا حظي كدا مع الناس..

كل ماعرف حد لازم يعمل حاجه او موقف معين اندم فيه ميت مره اني عرفت شخص كدا..

المهم...ان انا اخيرا ربنا كرم عليا...

الكلام النهارده عن اتنين من اصحابي

(ليالي) و(لارا)

طبعا دول مش اساميهم الحقيقيه..انا شلت الاسامي الحقيقيه عشان تبقى حقوق النشر محفوظه......

.

..............................................

من سنه سنتين تلاته

اتقابلوا بنات تلاته

(من غير معاد والله)

وواحد اتنين تلاته

اسمعوا احلى حاجه..

..................

ليالي دي بت جامـــــده

متعانه لوقت زنقـه

عصبيه بدون لازمـــه

وتزعل من غير مناسبه

تموت اوي في المحاضره

وكمان اوي في المذاكره

وتحب اوي الدكـــــــاتره

ولا تطيق ظباط شرطه

......................

شاطره اوي وكمان

بتعرف تعمل محشي

وعشان مافيش وقت

أي اكل يمــــــــــــــشي

....................

علطول ماشيه بسرعه

حرام عليكـــــي ياليــالي

ماشيين بالراحه كدا ليه

مش هامشي معاكوا تاني

...................

عمرهــــــــا ماأذت حد

عشـــــــان طيبه بجد

وكمان بتتحايل علينا

كتير عشان نــــــذاكر

بس احنا بنقنــــــع فيها

وبرضو مافيش مشاكل


(ليالي دي بت جامده واللي مايعرفها يجهلها)

.........................

(لارا) دي بقى حــــــكايه

طويـــله بدون نهـــــايه

خمسين الـــــــف قصه

وميت ملــــــــيون سلام

وياعيني كمان في الاخر

برضو مافيــــــش كلام

............

وتقول ياجماعه ابداً

ده كله اي كلام

انا بس لازم يبقى

في حياتي اي جنان

.............

تحب اوي اللبان

افكارها اي كلام

وكل ده من زمان

لارا قلبت جنان

..............

ومهما حاولـنا ناثر

عمرها ابدا ماتتاثر

دماغها ناشفه خالص

اكيــــــد لازم تتكسر

................

زمان قبل ماعرفها

انا كنت ولا بطيقها

بس الحال اتغير

ولا اقدر يوم افارقها

................

طيبه وبنت ناس

مليانه بالاحساس

ذكيه وكلها اخلاص

تحب الخير للناس

......................

دول احلى اصحاب في حياتي

ربنا انعم بيهم

ولا ليها لازمه حيــــــــــاتي

لو يوم مش بيهم

.......................

والمره الجايه بجد

هيبقى احلى كلام

عن اجمد واحده في الدنيا

اكيد طبعا منــــــــار

هناك 23 تعليقًا:

۩۝۩ Dr. Flavio ۩۝۩ يقول...

أحلى حاجه ف الدنيا .. لما تلاقي صاحب زي ما تتمناه بالظبط

يارب يخليكو لبعض وتتجمعوا دايما على الخير


ودول بقه بيتين بمناسبة البوست اللي جاي ..



من دلوقتي أنا هستنى .. ومعايا سوداني وفشار

وهأزأز لب وهاضحك .. يومها على فـشـر(منار)


هههههههههههههههههههههههههه

romansy يقول...

الصداقه احساس جميل لما تحسى انك لاقيه نفسك فى اصدقاءك ويقولوا لك على عيوبك ومميزاتك فعلا لما يكون هما مرايتك بيكون الانسان مطمن قوى
وبعدين بقى
بس بينى وبينك انتى انسانه متنعه فى اختيار صاحباتك
صديقه عاقله وبتذاكر
وصديقه عايشه حياتها هزار وضحك
طيب ياتلرى بقى
منار هتبقى ايه
مستنين نعرف المره اللى جايه

غير معرف يقول...

جميله اوي اوي
انتي دمك خفيف اوي اوي
وضحكتني موووت

كمان حلو اوي اصحابك تكتبي فيهم كلام زي كدا
ربنا يديم صداقتكم علطول

وهستنى المره الجايه اللي هيتكتب عنك
ميرفت امين

شبه إنسانه .....( سهوره ) يقول...

تصقيفة جامده لاحلى واجمل منار فى الدنيا
ايه يا بنتى الكلام الجامد ده
شاعره والله
عامة انا ممكن أتواضع ونبقى أصدقاء هههههههه
لا والله ليا الشرف
على فكره أنا صاحبة صاحبتى بس انتى جاربينى
وعلى فكرة تانيه انتى كنت وحشانى جدا لانك اتأخرت فى البوست ده
والنبى يا مانوره متتأخريش تانى

سلام بقى أصلى لسه جايه مت تحت وجعانه جدا

عندنا محشى مالوش حل
بس احنا عاملين حسبنا بس على قدانا
عشان لحد يفكر فى المحشى ولا حاجه

سلام

ايام زمان يقول...

منوره حبيبتي
ايه الجمال ده كله؟
برافو عليكي ياجميل والله. وربنا يديم الصداقه الحقيقيه على الناس كلها
ماليش دعوه انا عايزاكي تكتبي قصيده فيا انا كمان..اشمعنى بقى؟

ايام زمان

أبو العريف يقول...

ربنا يخليكم لبعض
الصداقه اجمل حاجه في الدنيا
وصعب اوي الواحد يعمل اصدقاء
عشان كده لازم يحافظ علي كل اصدقاءه

Asmaa يقول...

انا فاكرة انى كتبت كومنت مرة مطلعش ليه

عامة كلام جميل يا منورة وربنا يخليكى لاصحابك ويخليهم ليكى

ويخليكو كلكوا ليا :-)

وابقى افتكري اختك الغلبانة بحاجة

د.خالدأمين يقول...

حاضر

بسم الله



بجد انا بحقدك ويابختك فعلا



نفسيىالاقي حد صاحب بجد زي اصحابك ليالي ولارا


بجد لحكايه صعبه قوي

وكله معرفه طياري


لكن حد تحكيله ويحكيلك


وتشكيله ويشكيلك


وتبكي في حضنه ولاتخافي


مفيييييييييييييييييييييييييشش



اشكرك بشده



سلام

منــار فايد يقول...

فلافيو
_________

ماشي ياعم اشمت براحتك
ماتخافشي مش هشمت الاعادي
ههههههههه
بشكر مرورك جدا جدا

منــار فايد يقول...

رومانسي...

طبعا انا بشكر جدا جدا مرورك
منار هتبقى ميكس بين الاتنين
بحاول اكتب حاجه عن نفسي
بس الصراحه مش عارفه اكتب حاجه خالص
مش عارفه ليه كل مااكتب حاجه امسحها واقول ده مش فيا...

بس ان شاء الله لازم اكتب منار تبقى ايه ولو حاجه بسيطه

ودمت بخير

منــار فايد يقول...

ساظل اشبه نفسي بالانسانه

سهر ياسهر
مبسوطه اوي ياسهر ان الكلام عجبك
وحكايه شاعره فانا اصلا شاعره من زمان وعشان كدا قبلت التواضع بتاعك وسمحتلك تكوني صديقتي..

حبيبه قلبي انتي اصلا ياسهوره


روحي ياحبيبتي للمحشي يارب يكون برد

منــار فايد يقول...

ايام زمان

انتي طبعا ليكي حاجه اجمل واجمل
بس عايناهالك اشوفك واديهالك

ربنا يديم عليا يارب صداقه الجميع

منــار فايد يقول...

ميرفت امين

انا بحب اوي ناس ماعرفهمشي يكتبوا كومنت عندي
ياريت اتعرف بيكي بجد
ومرسي جدا على كلامك

منــار فايد يقول...

ابو العريف

معاك حق اوي في اللي كتبته كله
اسعدني مرورك

منــار فايد يقول...

د.خالد امين

فينك يادكتور مختفي من مده
وبعدين حاضر على ايه بقى؟؟

ماتزعلشي اوي كدا وتحقد عليا وتدعي عليا في سرك

بص ان شاء الله صدقني هتلاقي اصحاب كويسين
او فعلا هما موجودين بس انت مش واخد بالك

ودمت بخير

منــار فايد يقول...

باتر فلاي

سمسم نورتيني يابنتي
وبعدين لو كتبتي كومنت وماظهرشي فده لاني عامله اشراف على التعليقات
بمعنى مافيش تعليق هيبان الا لما اوافق انا طبعا
ايوه انا لازم اوافق عليه

هبقى اعمل ليكي انتي ومي وفاطمه واحده بس مش هتعجبكم
ههههههههههههه

غير معرف يقول...

منار
الكلام اللي انتي كاتباه جامد جامد
انتو اصحاب زي العسل
ربنا يخليكوا لبعض
بس مش عارفه انتو عكس بعض في حاجات كتير اوي
وبستغرب اوي في الكليه ان علاقتكم مستمره
والله مش بحسد ولا حاجه
بس ليالي غيرك خالص وفعلا زي مانتي كاتبه فيها
ولارا بقى لعبيه وغريبه شويتين
وانتي بقى بالظبط نص نص بين الاتنين.
راكبين ازاي على بعض مش عارفه

انا بحبك اوي والله
ومش قصدي حاجه تزعلك خالص

مي

maiosha يقول...

جميلة اوى اوى طريقتك فى الكتابة

واللى اجمل منها.. صداقتك وأصحابك

ربنا يخليكم لبعض وميفرقوش عن بعض ادبا

منــار فايد يقول...

غير معروف

مي
مش عارفه بالظبط مي مين؟
انا اعرف ميات كتير كتير
الروند بتاعي اصلا كله ميات
مهما كام
مرسي جدا على مرورك
واللي عايزه اقولهولك ان احنا عكس بعض في حاجات كتير
عشان كدا مافيش ملل بينا ودايما الحياه متجدده

منــار فايد يقول...

miosha

انا اللي متشكره اوي اوي
مرسي اوي ليك
وربنا يديم بينا المحبه فيه ولاجله

غير معرف يقول...

منار ماتزعليش عشان اتاخرت في الرد

انتي عارفه مشاكل النت عندنا في البلد
وخدت وقت كتير اوي عشان اعرف طريقه اكتب رد
انا عايزاكي تعلميني اعمل مدونه زيك عشان عجبتني اوي
وكمان فرصه الواحد يقضي وقت فراغ
دمك عسل عسل
وبتوحشينا علطول

علا عبد العزيز

أبو العريف يقول...

ايه الناس دي
انتي بتغيبي فين
من يوم ما اتقابلو التلات بنات ما حدش شافك

منــار فايد يقول...

ابو العريف
هانت خلاص البوست الجديد قارب على النزول
بجهز فيه دلوقتي
يارب يعجبكم