اخيراً وصلني تاااااااج

الحمد الله لي عوده.بعد انقطاع مده اسبوعين عن التعليق انا كنت بقنع نفسي ان انا مشغوله.بس انا كنت بنوي كتير اقعد واكتب اللي بالي

بس مش في بالي حاجه معينه اكتبها...اقوم اقفل الجهاز واقوم...

لغايه ماوصلني التاج من manoooosh

وبصراحه الحمد الله التاج ده جه في وقته ....

يارب اتمنى فعلا الاجابات تعجبكم وتعرفوني من خلالها اكتر وماتكونشي يارب اجابات مكرره

يالله نبدأ

............................................................................................................................

إسمك؟؟

منار نصر فايد

المشهوره بيه وسط اصحابك؟؟

اصحابي بيقولولي علطول نونو او منوره

في البيت بقى خد عندك خصوصا ماما.... بنوره من ماما.بنوره من بابا.كوسو من الاتنين

سنك؟؟

كمان خمس شهور إلا يومين يبقى عندي 22 سنه

مجال دراستي؟؟

خامسه طب..مش هاقولكم بقى إن ده كان حلم حياتي من صغري والكلام ده.بالعكس خالص

أنا عمري ماحلمت في يوم من الأيام اني ممكن ابقى دكتوره..دخولي الكليه لاكان برغبتي ولا كان برضو برفضي

ده تحقيق لأمنيه ماما وبابا..بس الحمد الله اكتشفت ان ربنا دايما عايزلنا الأحسن..

اسم مدونتك؟؟

ايه ده معقوله بتقرا ومش عارف اسم المدونه اللي بتقراها...

مدونتي اسمها (شباك موارب).على فكره انا عاجبني الاسم كمان اكتر منكم

ومستغربه ايه اللي جاب الإسم ده بالذات على بالي...بس انا كنت بفكر في مدونه لأي حاجه ولكل حاجه

اكتب فيها اللي مفرحني في يوم او اللي مزعلني في يوم....وانا مبسوطه جدا اني عملتها لاني حسيت اني بقيت مسؤله

عن حاجه معينه لو حدي..وهمي اني اكتب حاجه تعجبكم واشوف ده في تعليقاتكم..

المدونه بتاعتي مش مدونه شخصيه بالعكس هي بتاعتكم قبل ماتكون بتاعتي....

بالمره بقى نفسي أغير القالب بتاعها وأحط قالب من تصميمي وانا دلوقتي في مرحله المحاولات...

الصوره الرمزيه بتعبر عن إيه؟؟

الصوره بتاعتي صوره بنت ماسكه ماج وبتشرب شاي او نسكافيه حكايه بقى حرف الأس اللي مكتوب ده

مالوش اي حكايه مجرد مكتوب بس على المج اسالوا البنت دي ماتسالونيش,.,,,,

عاجبني اوي هدوء البنت وروقانها بتفكرني بنفسي في أيام الروقان....

هل فكرت في إغلاق المدونه والسبب؟؟

حرام عليكم هوأنا لسه لحقت أعمل أو أكتب حاجه دا أنا لسه بقول ياهادي...

الحمد الله عمري مافكرت اقفلها..متهيالي انا احسن ليا انقطع فتره عن الكتابه أحسن ماقفلها..

نفسي لو قررت في يوم اقفلها أجيبها كدا كلها من أولها لأاخرها واطبعها واخليها عندي

مش عارفه دايما عندي الاحساس ان هيجي وقت النت فيه هيبقى ولا حاجه يمكن يطلع وقتها حاجه تانيه..

جايز بقى في يوم من الايام اجي ادور عليها مالاقيهاش...

إيه ردت فعلك او حد قل أدبه عليكي في تعليق؟؟

الحمد لله ماحدش عمل كدا معايا...هو انا شويه ولا إيه....

انا في الاول ماكنتش حاطه الإشراف لأني ماكنتش اعرف ان في حاجه كدا

بس اول ماعرفته حطيته علطول..عشان حاجه من دي ماتحصلشي خالص

لكن لو اعتراض وجهات نظر مافيش مانع خالص من نشره

انت سؤالك على حد قل أدبه عليا.....

أسوء مدونه؟؟

ماقابلتهاش لسه...ممكن مدونه ماتعجبنيش بس مش معنى كدا إنها سيئه

هيحصل إيه للإيميل بتاعك لما تموت؟؟

ولا حاجه هيموت زي ماصاحبته ماتت

بس تصدق بالله أنا فكرت كتير في الموضوع ده قبل كدا

وفكرت بقى اكتب الإيميل والباسورد بتاعي في الوصيه قبل مااموت..

إمال إيه؟ عشان الناس تعزي..

إديت الباسور بتاعك لحد؟؟

واحد بس محمد اخويا..وأكيد مش ناويه أديه لحد خالص

اكيد لما أتجوز هاديه طبعا لجوزي..

بس حاليا محمد وبس وأنا كمان معايا باسوورد ايميله..

السفر بالنسبه ليكي إيه؟؟

انا بحب اوي اوي السفر..مش شرط لبلد تانيه..ممكن لمكان جديد في مصر ..

متهيالي كل الناس بتحب تسافر..أنا بقى بحب السفر بس بشرط مايطولشي عن شهرين..

ببقى مبسوطه أوي لما بقضي الإجازه في السعوديه بس لما نطول هناك بزهق جامد وبتوحشني مصر..

بحب السفر كطريق بغض النظر عن المكان اللي رايحاه.ورايحه أعمل إيه..

بحب أوي أخد صور مع الناس اللي مسافره معاهم سواء كانو قرايبي اصحابي ..

بحب أوي الوقت اللي بقضيه في مكه..أجمل وقت قضيته هناك..ولازم كل مره اتوه فيها ايام الزحمه

بالمناسبه بقى.أنا اقولكم انا سافرت فين..السعوديه,الأردن.طنطا.القاهره واسيوط كمان.

المود بتاعك؟

مودي حاليا مستقر...تلاقيني في ثانيه اتغيرت 180درجه..

من الاخر مودي سريع التقلب...

الأكله المفضله؟؟

أنا عموما مش أكيله أوي..بس مش معنى كدا مابحبش اكل..

بعمل اعمل الأكل أكتر من إني أكله..

بحب المحشي بتاع ماما تيتا,وكمان المكرونه الأسباكيتي والفراخ المشويه

وعموما أي حاجه مشويه..

بعشق حاجه إسمها حلويات..بمختلف أنواعه..بحب أوي أي حلا معمول ببسكوت الشاي..

بحب الفراوله جدا جدا..وكمان بحب أشرب نسكافيه

الصفات التي ورثتها عن والدك؟؟

من بابا انا واخده مش كتير..اتعلمت من بابا حب الخير.القلب الأبيض.الطيبه

الهدوء.تمالك الأعصاب وقت الغضب..حبيت كمان عادل امام عشان بابا بيحبه

وبقيت بتفرج على المصارعه عشان بابا بيحبها وبيتفرج عليها كتير..

الصفات اللتي ورثتها عن والدتك؟

ماما تقريبا أنا أخدت منها كل حاجه.وده كله بشهاده الجميع

حتى الشكل فأنا شكل ماما كمان..من ماما اتعلمت المسامحه في ثانيه حتى بعد زعل مده طويله

خدت من ماما كمان الرقه والهدوء..

-اكتر ست حاجات بكرهها؟؟

انا هاكتبهم وزي مايجوا..بكره أوي احساس الندم لأنه احساس صعب جدا جدا

كمان بكره اللوم المتكرر من اي شخص..بكره الظن السىء والحكم السريع على الناس

بكره الغرور والكلام الفاضي..

بكره التعميم في اي حكم...الظباط مش كويسين.المنايفه مش طيبين.الشعب كله حرامي

وخد عندك أي تعميم في الأحكام..بكره كمان الخيانه والتردد .بكره التمثيل

بكره الناموووووس والشمس الحاميه..

بكره سواقيين التاكسي باستثناء عشان مايبقاش تعميم..

بكره اللبس اللي بيتلبس الايام دي

بكره البنت النص محجبه نص شعرها باين..بتستفزني جدا جدا

بكره الألفاظ الوحشه اللي كل الفئات بقوا بيقولوها صغير وكبير

بكره التواكل وكلمه احنا هناخد زمنا وزمن غيرنا..لاني بحسها ضعف وعدم تحمل للمسؤليه..

أكتر ست حاجات بحبها؟؟

بعد ربنا عز وجل طبعا وماما وبابا بعد كدا طبعا

بحب الناس الطيبه.بحب اسمع دعوه من واحده ماعرفهاش

بحب أساعد الناس الغلابه مع اني مابعرفشي أعمل ده كتير

بحب أزور ماما تيتا واسمع الحواديت القديمه..بحب كمان الأطفال النونو خالص

بحب اطلع العصر في البلكونه وأبص على الاراضي الي ورا بيتنا.. والصوره اللي فوق دي من البلكونه عندي

..عندي حق ولا لا

بحب أوي اخرج مع بابا وامشي معاه وانا ماسكه في دراعه..

بحب أطلع رحلات مع اصحابي....وبحب كمان أعرف ناس جديده بس مش كتير.

بحب الشخص الواثق من نفسه

واخيرا بحب أنام كتيييييييييييييير

شخصيتك نوعها إيه؟؟

عصبيه وهاديه على حسب المزاج بس عموما عصبيه

وعلى رأي ماما خلقي في مناخيري

حديثا اتعلمت حاجه جديده إني أكبر على اي حاجه مش عاجباني

نادر كمان لما حد بيعرف ان أنا زعلانه أو مضايقه

بحب جدا اكون مبسوطه حتى بالكدب..

الشغل بالنسبه لك؟

لسه ماشتغلتش...نفسي طبعا أشتغل ويبقى ليا كياني حتى لو كان صغير

او العائد المادي قليل..

لماذا دخلت عالم التدوين؟

أنا ماكنتش أعرف أي حاجه عن التدوين خالص وكانت بدايتي كبدايه أي حد فيكم

لما كانت بتوصلني البوستات الجديده من زمايل عن النت كنت بدخل بقراها بس مش بسيب كومنت

لاني كنت مفكره انه لازم تكون عندي واحده وانا كننت لسه ماعملتش مدونه..ز

الفكره جت في بالي مره واحده عملتها كبدايه ساعدني ناس كتير كنت بسالهم دايما عن أي حاجه تقابلني

مش عارفاها...بصراحه الحمد الله عرفت ناس كتير اوي من المدونه كلهم أخواتي وانا بحبهم جدا اجدا

والحمد الله اول ماشفت اول تعليق حسيت بنجااااااااااااااااااااااح

أجمل كلمه اتقالت في وصف مدونتك؟؟

لسه ماحدش قال حاجه..كفايه عليا أوي التعليقات الجميله لان دي عندي حاجه كبيره اوي

أهميه التعليقات بالنسبه لك

نبض المدونه وعلامه استمرارها

بستنى دايما تعليقات اصحابي وبفرح أوي لما الاقي تعليقات جديده من ناس ماعرفهاش

المدونه بدون تعليقات كانها مسوده...

أحسن بوست كتبتيه؟؟

هما اتنين اول واحد بخصوص مناروالتاني اعلى درجات العشق

http://shebak-moareb.blogspot.com/2009/04/blog-post_4374.html

http://shebak-moareb.blogspot.com/2009/03/blog-post_19.html

عجبوني اوي بعد اما كتبتهم..وظهر دا كمان في التعليقات

أجمل بوست قريتيه؟؟

كتير اوي اوي بس مش هينفع اكتبهم كلهم

أفضل مدونه قرأتيها؟؟

كتير اوي كمان بس زي السؤال اللي قبله

النت بالنسبه ليكي إيه؟؟

بدخل نت عشان كل حاجه

لو عدى اسبوع مادخلتش نت فيه بحس بحاجه ناقصاني

تمرري التاج لمين؟؟

متهيالي كل الناس وصلهم التاج وجاوبوا عليه

شكلي انا اخر واحده

عموما هابعته برايفت للناس اللي ماوصلهاش...

أنا عارفه إني اتكلمت كتير..اعملكم ايه التاج اصلا اسئلته كتيره