.jfif)
اولا احب أقول لكل أصدقاء المدونه انكم وحشتوني اوي اوي اوي
وحشتوني كلكم من غير ماعرفكم
وحشتني الناس اللي بتسال على التاخير في البوست ,وبعتالي تعليقات مع اني مش عارفاهم
صحيح أنا عارفه ناس, وزعلانه أوي انهم ماعادوش بيمرو عندي
وزهقت من الأعذار....
بس ده مش معناه برضو ان حتى الناس اللي ماعرفهاش الا من المدونه بس بتهمني ارائها برضو
وبحبهم جدا..
بشكر اوي كل الناس اللي ردت على البوست اللي فات بالذات
لأنه بجد كان بوست يهمني اوي...
بعتذر اوي للناس اللي ممكن ماردتشي عليهم عشان ظروف امتحانات الباطنه الاسبوع اللي فات....
وبمناسبه الامتحان بتاع امبارح,على قد ماكنت مبسوطه او ي عشان خلاص امتحنت وخلصت من الباطنه مؤقتا
على قد مانا كنت طالعه من العنبر مخضوضه.....
انا كنت خايفه وانا داخله جدا لاني اول مره هاتعامل مع حاله لوحدي واشيتها لوحدي كمان
كرهت اوي بجد اللي بيحصل...
موضوع الفلوس ده صعب اوي..انا مش ضد اننا ندي العيانين فلوس
هما برضو غلابه وبيصعبوا عليا اوي وبيبقى في نفسي اعملهم حاجات كتير
واساعدهم بس كتير اوي بلاقي نفسي مافيش في اديا حاجه اعملهالهم.
اللي يحرق الدم بقى لما يكون واحد مش تعبان ولاحاجه.وعامل نفسه تعبان عشان ياخد فلوس
اللي حصل اني اول مادخلت على الحاله كان شاب عنده30 سنه..
ماكنتش عارفه ازاي ابدا معاه ولما يطلب الفلوس اقوله ايه او اتصرف معاه ازاي..
خصوصا انا بتكسف اوي اكلم حد في موضوع فلوس جدا...
ولما الفلوس ماتعجبوش يزعق وصوته يعلى...بتكلم بجد ياجماعه.انا عارفه اغلب الناس اللي مش طب مش هيصدقوا
بس هي دي الحقيقه...الدنيا بقت حاجه غريبه جدا...كل حاجه اتعكست..كان العيان دكتور والدكتور عيان...
انا لولا الله ثم ووقفه واحد زميل ليا كان على الحاله اللي جنبي كان زمان العيان خد مني ميت جنيه..
ولقيت زميلي زعقله والصوت علي ...............بجد انا كنت طالعه من العنبر مخضوضه
طلعت وانا حاسه اني عايزه اعيط لو كلمت اي حد..
معليشي بجد هو البوست المره دي ممل شويه او مافيهوش حاجه تشدكم
بس انا كنت مضايقه شويه ومخنوقه واستحملوا بقى......
هناك 21 تعليقًا:
الحمد لله
ان الامتحان عدى على خير
ربنا يوفقك وتنجحى وتبقى اكبر دكتوره
بس لازم تاخدى بالك مش كل الناس غلابه
بس فيه ناس بتحب تاخد على طول
وتمد ايديها انتى شكلك قلبك طيب
ربنا يوفقك
بسم الله
ايه يا دكتوره ؟
ينفع الكلام ده ؟
هو أنتى مش عارفه تقولى للراج العيان ده
إن أنتى وراكى مدونين رجاله
ممكن يقطعوه حتت لو زعق ليكى
لالا بجد أنتى غلطانه
وبعدين متزعليش نفسك يا ستى الحمد لله عدت على خير بس بعد كده عرفى الناس دى كلها ان احنا وراكى براقبتنا
والحمد لله ان الامتحان عدى على خير
عقبال يارب الدكتوراه
ولكى منى خالص التحيه
حبيبتي والله العظيم وحشاني جدا
كل الناس وحشاني حتى مدونتي وحشاني
المهم بقى .. اخويا في امتحان الباطنة برضو جامعة الزقازيق الدكتور قال قبل ما يدخلوا للحالات ماحد يدي الحالة اقل من 50 جنيه وانت وشاطرتك مع الحالة بس مش اقل من 50 جنيه
اخويا لما دخل الحالة قال له بص يا دكتور من اولها نواي تدفع كام؟؟
قاله اللي هاتقول عليه بس نخلص .. الحالة ملته الكلام كله طبعا ولا اكن دكتور في سيكشن بيشرح حالة بالتفصيل وتاريخ المرض كله
في الاخر قاله هات 300 جنيه انت كده فول مارك
اخويا قاله كتير اوي .. انا معايا 150 جنيه ولسه هاروح كمان وموصلات وانا اصلا مش من هنا وهاسافر واشتغالات كده
المهم بالعافية الحالة خدت 130 جنيه
اخويا كان معاه 500 جنيه بس صاحبه قاله حط معاك 150 في جيب لوحده وقول ان هم اللي معاك علشان يرضا ياخد كده
غير ان واحد صاحبه قبل كده والله الحالة خدت منه سلسة دهب كان لبسها..
علشان كده بيدخلوا للحالات في الامتحانات من غير موبايل او سلسة او حتى دبلة خطوبة بالفلوس اللي حاطنها رينج لهم وخلاص
هو استغلال عارفة طبعا بس فيه حالة مثلا عندها حاجة تشبهه الشلل الرعاش هي اشهر حالة في مستشفى الجامعة بتاعة الزقازيق
ده كان حلاق وجاله المرض ده من 16 سنه وهو عنده 42 سنة .. هايعيش منين؟؟؟؟؟؟؟
بيعيش على الفلوس اللي بتدخله من الحاجات اللي زي ديه.. هو قبل انه يكون حالة تدربوا عليها .. بس كمان بياخد حقه
يعني شيلني واشيلك يا معلم
ربنا يوقفك يارب يا قمر وما تشغليش بالك بالمواضيع ديه
السلام عليكم ورحمة الله
ازيك يا منار
كان جميل الموضوع الي فات
والموضوع بتاع النهاردة قضية احترنا فيها كتير
بصي يا ستي انا رايي انك تدي العيانين فلوس عادي
بس نيتك بينك وبين ربنا انك بتديها مساعده مش عشان الشيت
بس بشرط انه مادام رضي يفاصل ويغالي في تمن الشيت يببقى انتي كمان لازم تفاصلي معاه
دايما حسسي العيان انك مش محتاجاه عشان مايستغلكيش
وعلى فكرة معظم الدكاترة مش بيسألوا في الشيت اصلا
بالتوفيق يا منار
واجمدي كده عشان باقي الامتحانات
باسم الله
أنا سعيد جداً بتعليقك عندي
وأعجبتني كلماتك التي أعطتني شعور بالأمل
وأكون سعيد اكثر إن زرتني على مدونتي الرئيسيه
fares-poet.blogspot.com
السلام عليكم ورحمة الله تعالى وبركاته
اهم حاجة انك خلصتى الباطنة ........ياساتر هم وانزاح بأذن الله عقبال الباقى ان شاء الله يارب
وتنجحى وتخلصى الكلية دى على خير وتبقى عضوة فى النقابة معانا يادكتورة منال يااااااااااارب.
*******هذا ليس للنشر
دكتورة منار معلش هى غلطة املائية
(إلاهــــــــــــــــــــــي
إلاهي)خطأ تكتب هكذا(آلهى)
وشكرا
دكتورة منار ايه ده يابنتي دا انتي كبيرة واحنا منعرفش
والله البوست لذيذ مفيهوش حاجه بالعكس حلو ان الواحد يفضفض
وانا هقولك ايه انا مكسوفه منك من زمان بطلت ازورك
انا بالعافيه بهتم بمدونتي اللي بتشتكيني
وانا انشاء الله ناويه اقرا كل اللي فاتني لان كتاباتك بتمتعني بجد
وعلى فكرة انا نفسي اكون زيك كدا وتكون في مغامرات
بجد حاجه جميله ومبروك عليكي خلصتي امتحاناتك
باتوفيق يامنار
ادعيلي اختك المكافحه في الثانويه العامه
Romancy
انت اللي قلبك طيب اكيد
بشكر مروك بجد عندي
الشاعر الحزين
فين بقى المدونين ماللي حصل حصل خلاص
وانا انادي وماحدش يرد عليا خالص
الا بعد اما خلصت الخناقه
ههههههههههههه
اشكر مرورك ياصديقي
وتسعدني تعليقاتك دائما
فتافيت
الحمد الله عدتي بسلامه
لما قريت كلامك الحمد الله على كدا انا طلعت اروبه
هههههههههههههههههههههه
دمتي بخير
ابو العزم
اسعدني مروك جدا
واي خناقه هنادي عليك علطول
مفروض ان ورايا رجاله
دمت بخير
الشاعر محمد عبد الرحمن
انا اسعد بمروك عندي
وارجو الا تكون الاخيره
ماتقدرشي اصلا
هههههههههههههه
norahaty
ana asaad begad
wefarhana aweee aweeee
wemodawanatek agbany gedaan gedaan
بسمه صلاح
ولايهمك ياعمري
انا عاذراكي جدا
ربنا معاكي ويوفقك يارب وتحققي كل اللي نفسي فيه
وتبقى احسن مننا كلنا
ربنا يكون فى عونك على كلية الطب وامتحاناتها
انا سمعت فعلا قبل كدة ان العيانين بياخدوا فلوس من الطلبة لكن مكنتش متخيلة انه بالشكل دة
ربنا معاكى يا قمر
بسمع دايما عن موضوع العيانين اللى بياخدوا فلوس
بصراحة الله يكون فى عونك
وربنا معاكى
سعيدة بالتعرف على مدونتك
تحياتى رلك
وعلى فكرة انا عارفة انى مقصرة معاكى يا قمر
بس تم وضع المدونة فى الريدر يا فندم لمتابعة قلمك الجميل يا قمر
وادى بوثة علشان متزعليش
مممممممممممممممممممممممممممممممواه
بسم الله
عزيزتي شباك موارب .. تسعدني متابعة مدونتك
رايك في مدونتي يسعدني .. و ادعوكي لمتابعة سلسلة ( الضياع اول الطريق )
http://en3kaas.blogspot.com/
مع محبتي
سارة
رؤيه
manooooosh
انعكاس
بعتذر ياجماعه جدا عن التاخير في الرد
بشكر جدا جدا مروركم
وتعليقاتكم الجميله عندي
بالنسبه لساره فالوعد قائم بإذن الله بمتابعه سلسله كتاباتك
ودمتم جميعا بخير
منار فايد
ليكي عندى تاج يا عثل
انا عارفة انك مشغولة فى الامتحانات.. بس ان شاء الله اول ما تفضى
وربنا معاكى باذن الله فى الامتحانات
إرسال تعليق